Yɩɩn‑sõamyã 71 - WẼNNAAM SEBRE 2014

Nin-kẽem pʋʋsgo

¹ Sẽn-Ka-Saabo, yãmb la m zĩ-soalgdga, bɩ y ra tol n bas tɩ yãnd paam maam abada!

² Bɩ y fãag maam yãmb tɩrlmã pʋga, tɩ m tõog n põse! Kɩll-y y tʋbr n kelg-ma, la y fãag-ma!

³ Yɩ-y pĩig sẽn yaa mam soondg zĩiga, mam sẽn tõe n kẽngẽ wakat fãa, tɩ yãmb tõe n fãag maam. Bala, yãmb n yaa mam pĩiga, la m pãng zĩiga.

⁴ Mam Wẽnnaam, fãag-y maam nin-wẽng nugẽ, fãag-y maam tʋʋm-wẽns maandbã ne nen-keglem dãmbã nusẽ!

⁵ Zu-soab a Wẽnnaam, mam tẽebã fãa yaa yãmba! Hal mam bi-bɩɩlem wakate, mam teega yãmba.

⁶ Mam teega yãmb hal tɩ m ket m ma pʋgẽ. Yãmb n yiis maam m ma pʋgẽ. Yãmb la mam na n pẽgd n ka basdẽ ye.

⁷ Neb wʋsg nifẽ, mam wẽnda wa bõn-bãnde, la yãmb n yaa mam zĩ-soalgdg sẽn tar pãnga.

⁸ Mam noor pida ne yãmb pẽgre, la ne yãmb ziirã togsg wakat fãa.

⁹ Mam kʋʋlem wakate, bɩ y ra zãag y meng ne-m ye. Mam pãngã sã n wa n sɛ, bɩ y ra bas-m ye!

¹⁰ Bala, mam bɛɛbã gomda mam yelle. Sẽn baood-b n dat n sãam mam vɩɩmã yẽsda ne taaba.

¹¹ Bãmb yetame: Wẽnnaam bas-a lame. Rig-y-yã-a n tɩ yõke, bala, ned ka be n na n fãag-a ye.

¹² Wẽnnaam, bɩ y ra zãag y meng ne maam ye! Mam Wẽnnaam, wa-y tao-tao n wa sõng-ma!

¹³ Bɩ yãnd yõk sẽn dõt-b maamã tɩ b menem! Bɩ sẽn baood-b maam ne wẽngã rɩ yãnde, la b paam yʋ-sãanga!

¹⁴ La maam, mam na n kell n talla tẽebo, mam na n kell n pẽgda yãmb n paasdẽ.

¹⁵ Mam noor na n togsda yãmb tɩrlmã ne y fãagrã wakat fãa. Bala, mam ka tõe n sõd-b n sɛ ye.

¹⁶ Zu-soabã Sẽn-Ka-Saabo, yãmb pãng tʋʋmã yĩnga, mam na n waa yãmb nengẽ. Mam na n gomda yãmb y yembr tɩrlmã yell bala.

¹⁷ Mam Wẽnnaam, yãmb zãmsa maam hal m bi-bɩɩlem wakate, la hal tɩ ta moasã, mam gomda yãmb bõn-bãnã yelle.

¹⁸ Mam Wẽnnaam, baa mam sã n wa kʋʋl tɩ m zug pelge, bɩ y ra bas-m ye, hal tɩ m tõog n wilg zamaan-kãngã nebã yãmb nugã tʋʋmã, la m wilg zamaan ning sẽn wat-a wã yãmb pãng tʋʋmã.

¹⁹ Mam Wẽnnaam, yãmb tɩrlmã zẽk n tãaga saasẽ, yãmb maana bõn-kãsemse. Mam Wẽnnaam, ned ka be n zem yãmb ye.

²⁰ Yãmb kɩtame tɩ yel-pakr ne tood wʋsg paam tõndo. La yãmb n na n leb n kõ maam vɩɩm, yãmb n na n leb n yiis maam bog-zulungã pʋga.

²¹ Bɩ y paas maam ziiri, la y paas-m daoodo!

²² Mam Wẽnnaam, yãmb sɩdã yĩnga, mam na n wẽe pɛndg n pʋʋs-y barka. Israyɛll Pʋ-Peelem-Soaba, mam na n yɩɩla ne kʋnd n pẽg yãmba.

²³ Mam na n kaasa ne sũ-noog n yɩɩl n pẽg yãmba, yãmb sẽn fãag mam vɩɩmã yĩnga.

²⁴ Mam zelemdã na n gomda yãmb tɩrlmã yell daar fãa, bala, sẽn dag n baood-b maam ne wẽngã paama yãnde, ne paoogre.