Yɩɩn‑sõamyã 7 - WẼNNAAM SEBRE 2014

Ned sẽn yõkd Sẽn-Ka-Saab sɛɛga

¹ A Davɩɩd sũ-sãang yɩɩlle, a sẽn yɩɩl Sẽn-Ka-Saab yĩnga, Benzame buudã ned a Kuus wɛɛngẽ.

² Sẽn-Ka-Saab sẽn yaa mam Wẽnnaam, mam baooda zĩ-lilldg yãmb nengẽ. Fãag-y maam m namsdbã fãa nusẽ. Fãag-y maam,

³ sã n ka rẽ, b na n fãsa maam wa gɩgemd sẽn yõk bũmb tɩ ned ka tõe n fãagã.

⁴ Sẽn-Ka-Saab sẽn yaa mam Wẽnnaam, sã n yaa tɩ mam maana sẽn ka zemse, wall m maana ned wẽnga,

⁵ wall sã n yaa tɩ ned maana maam neere, tɩ mam lebs-a wẽnga, wall mam sã n yõka m bɛ n deeg a bũmb zaalem,

⁶ bɩ m bɛyã rig maam n tɩ yõke! Bɩ a lub maam n dʋ n tabe, n vu maam tomẽ n kɩt tɩ m ziirã sɛ!

⁷ Sẽn-Ka-Saabo, yik-y y sũ-yikrã pʋga, yik-y n seg-y m bɛɛbã b sũ-puugrã pʋga! Yik-y n sõng-y-ma, bala, yãmb yaa bʋ-kao-tɩrg soaba.

⁸ Bɩ soolem toy-toyã nebã fãa tigim n gũbg yãmba, Zĩnd-y y naam geerã zug n soog-ba!

⁹ Sẽn-Ka-Saabo, yãmb n kaood soolem toy-toyã nebã bʋʋdo, Sẽn-Ka-Saabo, bʋ-y mam bʋʋd wa sẽn zems mam tɩrlmã, la wa sẽn zems mam burkĩndã.

¹⁰ Mam kot-y lame tɩ y kɩt tɩ nin-wẽnsã tʋʋm sɛ, la y paas nin-tɩrg pãnga. Bala, yãmb yaa tɩrlem Wẽnnaam, yãmb n feesd ninsaalbã sũyã tagsd la b ratem!

¹¹ Wẽnnaam yaa mam gãongo, bãmb n fãagd nin-tɩrse.

¹² Wẽnnaam yaa bʋ-kao-tɩrg soaba. La b sũur tõe n yika wakat buud fãa.

¹³ Nin-wẽng sã n ka tek yam, Wẽnnaam saasda b sʋʋga, n dʋʋsd b tãp n dat n tão.

¹⁴ Bãmb segenda zab-teed sẽn kʋʋde, la b segend b pɛɛm tɩ yaa bug-vɩlense.

¹⁵ Nin-wẽng saagda wẽnga, a tagsd tʋʋm-beedo, la a rogda zirẽ-beedo.

¹⁶ Yẽnda tukda bok n zulg-a, la a na n wẽneg n lʋɩ a pʋga.

¹⁷ Yẽnda tʋʋm-beedã lʋɩta a meng zugu, la a tʋʋm-wẽnsã sigda a meng zugu.

¹⁸ Mam na n pʋʋsa Sẽn-Ka-Saab bark b tɩrlmã yĩnga. Mam na n yɩɩl n pẽga Sẽn-Ka-Saabo, mam na n yɩɩl n pẽga Sẽn-Ka-To yʋʋre.