Yɩɩn‑sõamyã 69 - WẼNNAAM SEBRE 2014

Sũ-sãang yɩɩlle

¹ Yaa a Davɩɩd yɩɩlle, yɩɩlã naab yĩnga. Yaa yɩɩll sẽn boond tɩ ‹rulg lɛlma.›

² Wẽnnaam, fãag-y maam, tɩ koomã lima maam n tãag m koakoayã.

³ Mam suta zĩ-zulumsẽ wã begd pʋgẽ, n ka tõe n yals ye. Mam lisda koomã tẽngre, la ko-zoetmã peega maam n loogdẽ.

⁴ Mam kelmame halɩ tɩ m pãng sɛ, mam koeesã kʋɩɩme. Mam gũu m Wẽnnaamã sõngr halɩ tɩ m ninã pãng booge.

⁵ Sẽn kis-b maam zaalmã sõor yaa wʋsg n yɩɩd m zugã zoobdo. Neb nins sẽn dat n sãam maam, n tugd beem ne maam zaalmã tara pãnga. Mam sẽn ka rɩk bũmb ningã, yaa tɩlɛ tɩ m bao-a n lebse.

⁶ Wẽnnaam, yãmb mii mam yalemdã, la mam kongrã ka solg ne yãmb ye.

⁷ Zu-soaba, Sẽn-Ka-Saab sẽn yaa Saasẽ-Pãng-Soaba, bɩ y ra sak tɩ sẽn maand-b tẽeb ne yãmbã paam yãnd mam yĩng ye! Israyɛll Wẽnnaam, ra bas-y tɩ sẽn baood-b yãmbã paam paoogr mam yĩng ye.

⁸ Bala, yaa yãmb yĩng la mam sak n deeg tʋyã, yaa yãmb yĩng la mam deeg paoogre.

⁹ Mam lebga sãan m ba-biisã yĩnga, mam lebga nin-zẽng m ma-biisã yĩnga.

¹⁰ Bala, yãmb doogã nonglem sooga maam zãnga, la neb nins sẽn tʋʋd yãmbã tʋy lʋɩɩ mam zugu.

¹¹ Mam loee noor n yãbe, la rẽ waa ne tʋy mam zugu.

¹² Mam dɩka sũ-sãang fuug n yeelge, la mam lebga yel-bũnd m bɛɛbã yĩnga.

¹³ Sẽn zĩ-b tẽngã rignoorẽ wã gomda mam yell wẽnga, la sẽn yũud-b rã-toosã gomda mam yell ne yɩɩla.

¹⁴ La maam, mam pʋʋsda yãmb a Sẽn-Ka-Saabo! Wẽnnaam, yaa wakat yãmb sẽn tog n leok maam, yãmb nonglem-kãsengã yĩnga, la y fãagrã sẽn yaa sɩdã yĩnga!

¹⁵ Wẽnnaam, yiis-y maam begdẽ wã, tɩ mam da leb n sud ye! Fãag-y maam ne neb nins sẽn kis maamã, la y yiis-m ko-zulungã pʋga!

¹⁶ Ra bas-y tɩ ko-wĩigã loog ne-m ye, ra bas-y tɩ ko-zulungã rɩ-m ye, ra sak-y tɩ bulgã vel-m ye!

¹⁷ Sẽn-Ka-Saabo, leok-y-ma! Yãmb nonglmã yaa sõama mam yĩnga. Yãmb nimbãan-zoeer-kãsengã yĩnga, bɩ y wẽnemd n ges-ma.

¹⁸ Da solg y nengã ne y tʋmtʋmdã ye! Bala, mam bee yel-pakr pʋga, rẽ wã, bɩ y leok-m tao-tao!

¹⁹ Bɩ y kolg maam, la y fãag-ma! M bɛɛbã sẽn yaa wʋsgã yĩnga, bɩ y yols-ma!

²⁰ Yãmb miime tɩ b tʋʋda maam, la b ningd maam yãnde, la b paoogd maam. Mam zabd-n-taasã fãa bee yãmb taoore.

²¹ Paoogrã sãamda m sũuri, tɩ m lebg bãada. Mam dag n tẽedame tɩ neb na wa n zoe m nimbãanega, la m ka yãnd ye. Mam dag n tẽedame tɩ neb na wa n bels-ma, la m ka paam ye.

²² Bãmb ningda zẽnem mam dɩɩbẽ, la ko-yũud sẽn tar maam yĩnga, b kõta maam miisim tɩ m yũ.

²³ Bɩ b rɩɩbã lebg bẽdg b yĩnga, bɩ b paoongã lebg tãoog b zo-rãmbã yĩnga!

²⁴ Bɩ b ninã menem tɩ b ka leb n neẽ ye. Bɩ y kɩt tɩ b seesã koms tɩ b kuud wakat fãa!

²⁵ Bɩ y sik y sũ-puugrã b zutu! Bɩ yãmb sũ-kãbrã rɩ-ba!

²⁶ Kɩt-y tɩ b tãb-sikã lebg raboodo, tɩ ned da leb n zĩnd b fu-rotã pʋs ye!

²⁷ Bala, bãmb namsda yãmb sẽn zoe n sɩbg-a soabã, la yãmb sẽn pogl-a soabã toog n lebg b sõasga.

²⁸ Rɩk-y b beeg-kãng n paas b beeg-kʋdgã. Ra bas-y tɩ b paam bʋʋm yãmb taoor ye!

²⁹ Yẽes-y b yʋyã vɩɩm sebrẽ wã, Bɩ b yʋyã ra naag nin-tɩrsã yʋy ye!

³⁰ La maam, mam yaa nimbãan-neda, n be toog pʋgẽ. Mam Wẽnnaam, bɩ yãmb fãagrã sõng-ma!

³¹ Mam na n yɩɩl n pẽga Wẽnnaam yʋʋre. Mam na n zẽka bãmb yʋʋre, la m pʋʋs-b barka.

³² Bõn-kãng nooma Sẽn-Ka-Saabo, n yɩɩd mam sẽn na n kõ-b naafo, bɩ loalg ne yɩɩl la nao-bendo!

³³ Naong rãmbã na n yãnda rẽ n maan sũ-noogo. Yãmb dãmb sẽn baood Wẽnnaamã, paam-y raoodo!

³⁴ Bala, Sẽn-Ka-Saab kelgda nimbãan-dãmbã, la b ka paoogd neb nins b sẽn kẽes bi-bees roogã ye.

³⁵ Bɩ yĩngr la tẽnga, la ko-kãsengã ne bõn-vɩɩs nins sẽn be a pʋgẽ wã pẽg Sẽn-Ka-Saabo!

³⁶ Bala, Wẽnnaam na n fãaga Sɩyõ, la b lebs n me Zʋʋda soolem tẽmsã, tɩ neb kẽ be n soog-ba.

³⁷ Wẽnnaam tʋmtʋmdbã yagens n na n soog tẽn-bãmb tɩ yɩ b pʋɩɩre, la sẽn nong-b bãmb yʋʋrã n na n zĩnd be.