Yɩɩn‑sõamyã 68 - WẼNNAAM SEBRE 2014

Wẽnnaam belem zĩisi

¹ A Davɩɩd yɩɩlle. Yaa yɩɩlã naab yĩnga.

² Wẽnnaam sã n tik n yiki, b bɛɛbã sãeegdame. La sẽn kis-b wẽnnaamã fãa zoeta bãmb taoore.

³ Nin-wẽnsã menemda Wẽnnaam taoore, wa sɩ-ribd sẽn yẽnegd bugmẽ.

⁴ La nin-tɩrsã maanda sũ-noogo, n kɩdemd Wẽnnaam taoore. Bãmb sũur noomame tɩ b kɩdemdẽ.

⁵ Yɩɩl-y Wẽnnaam yĩnga, pʋd-y yɩɩl n pẽg b yʋʋrã! Tuk-y sore, n deeg sẽn zao-a sawatã n watẽ wã! Bãmb yʋʋr boondame tɩ Sẽn-Ka-Saabo! Kɩdm-y bãmb taoore!

⁶ Wẽnnaam sẽn be b ro-sõngã pʋgẽ wã n yaa kɩɩbs ba, la b yaa pʋg-kõap sõangda.

⁷ Wẽnnaam n kɩtd tɩ sẽn ka tar-a ned paam buudu, la b tõe tɩ bi-bees paam lohorem sũ-noogo. La b kɩtdame tɩ kɩɩsdbã zĩnd tẽn-koɛɛng pʋga.

⁸ Mam Wẽnnaam, yãmb sẽn wa n lʋɩ y nebã taoorã, yãmb sẽn wa n kẽnd zĩ-peen-daagẽ wã,

⁹ tẽngã rigimdame, la saasã kiigda koom yãmb a Wẽnnaam taoore, yãmb sẽn yaa Sinayi Wẽnnaam, n yaa Israyɛll Wẽnnaamã taoore.

¹⁰ Mam Wẽnnaam, yãmb sika sa-ko-sõngo! Yãmb nebã rag n yɛɛme, la y leb n kɩtame tɩ b yẽege.

¹¹ Yãmb nebã bee zĩig ninga, yãmb a Wẽnnaam sẽn segl naong rãmbã yĩng y sõmblmã pʋgẽ wã.

¹² Zu-soabã kõo noore, la pagb nins sẽn moond koe-noogã yaa tãb-bi-kʋʋngo.

¹³ Dẽ, tãb-biisã ne b rĩm-dãmbã tara zoeese. Bãmb zoetame tɩ pʋg-neerã sẽn pa yirã pʋɩt te-zɛɛdem.

¹⁴ Tɩ yãmb yaool n leb tãb-sikẽ n gãe, tɩ wall pɩgs bolg ne wanzuri, t'a kõbdã pɩnd wa b bolga sãnem.

¹⁵ Sẽn-Ka-To sẽn wa n sãeeg rĩm-dãmbã, rẽ tɩ neez n dʋʋgd Salmond tãngã zugu.

¹⁶ Wẽnnaam tãnga, Basã tãnga, tãng sẽn tar kũn wʋsgo,

¹⁷ Tãms sẽn tar kũn wʋsgo, bõe yĩng tɩ fo maand sũ-kiir ne tãng ning Wẽnnaam sẽn yãk n na n zĩnd a zugã? Sẽn-Ka-Saab na n kɩtame tɩ beenẽ lebg b zĩ-zĩidg wakat sẽn ka sɛta.

¹⁸ Sẽn-Ka-Saab saar-dãmb sõor tata tusa-tusa, la Zu-soabã bee bãmb sʋka, tɩ Sinayi be zĩ-sõngẽ wã.

¹⁹ Sẽn-Ka-Saabo, yãmb sẽn wa n dʋʋd yĩngrã, yãmb zãa yembse, yãmb yãka kũun ninsaalb sʋka, baa ne kɩɩsdbã nengẽ, n kɩt tɩ Sɩyõ lebg yãmb zĩ-zĩidga.

²⁰ Bɩ Zu-soabã paam pẽgr daar woo daare! Bãmb geta d yelle, la yaa Wẽnnaam-kãng n yaa tõnd fãagre.

²¹ Wẽnnaam-kãng n yaa Wẽnnaam sẽn fãagd tõndo, Wẽnnaam-kãnga, Zu-soabã Sẽn-Ka-Saab n tar pãng n tõe n fãag-d ne kũum.

²² N-yẽe! Wẽnnaam na n bõgsa b bɛɛbã zutu. Yaa ned ning zug sẽn tar zoobd t'a manesem ka zemsã.

²³ Zu-soabã yeelame: «Mam na n kɩtame tɩ bãmb yi Basã n lebg n wa, mam na n kɩtame tɩ bãmb yi ko-kãsengã zĩ-zulungẽ wã n lebg n wa.»

²⁴ Tɩ yãmb naoã tõe n tab zɩɩm, tɩ y baasã zɛlmã paam pʋɩɩr bɛɛbã nengẽ.

²⁵ Mam Wẽnnaam, bãmb yãnda yãmb sẽn kẽnde. B yãnda mam dĩmã la m Wẽnnaamã sẽn kẽnd n wat zĩ-sõngẽ wã.

²⁶ Yɩɩn-yɩɩndbã lʋɩɩ taoore, tɩ sẽn wẽed-b yʋʋm-teedã pʋgda, tɩ pʋg-sadbã be sʋkã n wẽed sɩlsãgse.

²⁷ Pẽg-y Wẽnnaam kʋʋngã sʋka, Pẽg-y Sẽn-Ka-Saabo, yãmb fãa sẽn yaa Israyɛll buudã nebã!

²⁸ Benzame buudã sẽn yaa yao-zʋʋgã n lʋɩt taoore, tɩ Zʋʋda nanambsã sẽn yer b naam futã pʋgda, tɩ Zabulõ ne Neftali buudã nanambs yaool n pʋgle.

²⁹ Fo Wẽnnaamã yeta foom tɩ f paam pãnga, mam Wẽnnaam, kɩt-y tɩ yãmb sẽn maan bũmb nins n kõ tõndã paam pãnga!

³⁰ Zĩnd-y y roog ning sẽn lug Zeruzalɛmã pʋga, zĩig ning rĩm-dãmbã sẽn wat n kõt yãmb kũunã,

³¹ n leng rũngã sẽn be tãnwĩisẽ wã. Leng-y lol-kʋʋngã ne nebã sẽn wẽnd nag-bi-kʋʋngã. Leng-y sẽn vũnumd-b n kõt yãmb wanzuri wã! Sãeeg-y neb nins sẽn nong zabã!

³² Nin-kãsemsã sẽn yit Ezɩpt n watẽ wã. Kuus nebã zoet n watame, tɩ b nus teesd Wẽnnaam sẽnẽ.

³³ Dũniyã soolem-dãmba, yɩɩl-y n pẽg-y Wẽnnaam, Yɩɩl-y n pẽg-y Zu-soabã.

³⁴ Yɩɩl-y n pẽg-y sẽn zao-a sa-gãnã, hal kʋdem-wẽndẽ sa-gãnã! Bãmb kɩtame tɩ b koɛɛg rãamd yi tɩ b koɛɛg rãamd yi ne pãnga.

³⁵ Sak-y n deeg-y tɩ Wẽnnaam tara pãnga! Bãmb dɩta naam Israyɛlle, la bãmb pãngã bee sawatẽ.

³⁶ Mam Wẽnnaam, yãmb be y zĩ-sõmsẽ wã, la yãmb seka zoeese. Israyɛll Wẽnnaamã n kõt b nebã pãnga, ne pãn-tõogo. Bɩ Wẽnnaam paam pẽgre!