Yɩɩn‑sõamyã 67 - WẼNNAAM SEBRE 2014

Buudã fãa tog n pẽga Wẽnnaam

¹ Yɩɩll sẽn yɩɩnd ne yʋʋm-teed sẽn tar susi. Yaa yɩɩlã naab yĩnga.

² Bɩ Wẽnnaam zoe tõnd nimbãanega, la b ning-d barka. Bɩ b kɩt tɩ b nengã vẽenem yãg tõnd zugu,

³ tɩ dũniyã rãmb tõe n bãng yãmb soayã, la tɩ bu-zẽmsã fãa tõe n bãng yãmb fãagrã!

⁴ Wẽnnaam, bɩ buudã fãa pʋʋs yãmb barka, la bɩ nebã fãa pʋʋs yãmb a Wẽnnaam barka.

⁵ Bɩ bu-zẽmsã kɩdem n kaas ne sũ-noogo. Bala, yãmb bʋʋda nebã bʋʋd ne tɩrlem. Yãmb n tɛt nebã buud fãa dũniyã zugu.

⁶ Wẽnnaam, bɩ buudã fãa pʋʋs yãmb barka, la bɩ nebã fãa pʋʋs yãmb a Wẽnnaam barka.

⁷ Tẽn-gãongã bõn-koaadl womdame. Tõnd Wẽnnaamã ningda tõnd barka.

⁸ Bɩ Wẽnnaam ning tõnd barka! Bɩ dũniyã kɩrems nebã fãa zoe bãmba.