Yɩɩn‑sõamyã 66 - WẼNNAAM SEBRE 2014

Wẽnnaam pẽgre, b bõn-bãnã yĩnga

1 Yɩɩlle, yɩɩlã naab yĩnga.

¹ Yɩɩlle, yɩɩlã naab yĩnga. Dũniyã nebã fãa, kaas-y n waoog-y Wẽnnaam!

² Yɩɩl-y n waoog-y bãmb yʋʋrã, pẽg-y bãmb n wilg b ziirã!

³ Yeel-y Wẽnnaam yaa: Ad yãmb tʋʋmã seka zoeese! Yãmb pãngã sẽn yaa kãsengã yĩnga, yãmb bɛɛbã kong n waoogda yãmba.

⁴ Dũniyã gill wõgemdeda yãmb taoor n yɩɩnd n pẽgd yãmba. B yɩɩnd n waoogda yãmb yʋʋrã.

⁵ Bɩ y wa n ges Wẽnnaam tʋʋmã! B tʋʋm-kãsemsã ninsaalb yĩngã seka zoeese.

⁶ Wẽnnaam teka ko-kãsengã t'a lebg tẽn-koɛɛnga, b pɩʋʋga kʋɩlsã ne nao n looge. Bõn-kãng kɩtame tɩ tõnd maan sũ-noog bãmb pʋgẽ.

⁷ Bãmb n so fãa ne b pãngã wakat fãa, bãmb nin bee tẽmsã zutu. Bɩ kɩɩsdbã ra wuk b mens ye!

⁸ Ninsaalba, waoog-y tõnd Wẽnnaamã, Zẽk-y y koees n pẽg bãmba!

⁹ Bãmb n kõt tõnd vɩɩm, la b ka basd tɩ tõnd naoor lak ye.

¹⁰ Bala, mam Wẽnnaam, yãmb n feesd tõndo! Yãmb yɩlgda tõnd wa b sẽn yɩlgd wanzuri.

¹¹ Yãmb talla tõnd n tɩ kẽes bẽdgẽ, yãmb dag n zɩlga tõnd zɩɩb sẽn zɩsa.

¹² Yãmb basame tɩ neb tab tõnd zut n looge, n kɩt tɩ tõnd pɩʋʋg bugum ne koom, la yãmb yiisa tõnd be, n kẽes tõnd naar pʋga.

¹³ Mam na n kẽnga yãmb doogẽ wã ne maoong sẽn yõogd bugum, mam na n pidsa m pʋlengã ne yãmba.

¹⁴ Yaa pʋleng ning mam sẽn yaag m noor n pʋlmã, ne mam noorã sẽn gom goam nins m yel-pakrã wakatã.

¹⁵ Mam na n maana rũm-nobds maand sẽn yõogd bugum n kõ yãmba, pe-raad ne wisdu. La m kɩt tɩ rũm-bɛd ne boees maand bug-zõos zẽk n ta yãmba.

¹⁶ Yãmb dãmb fãa sẽn zoet Wẽnnaamã, wa-y n kelg-y-yã! Wa-y tɩ m na n togs-y-la bũmb nins Wẽnnaam sẽn maan n kõ maam.

¹⁷ Mam yaaga m noor n bool bãmba, la m zelemdã pẽga bãmba.

¹⁸ Wẽng sã n dag n beẽ mam sũurẽ, Zu-soabã rag n kõn kelgẽ maam ye.

¹⁹ Sɩd me, Wẽnnaam kelga maam, bãmb wʋma mam pʋʋsgã.

²⁰ Bɩ Wẽnnaam ning sẽn ka zãgs-a mam pʋʋsgã, la sẽn ka zãag b nonglmã ne maamã paam pẽgre.