Yɩɩn‑sõamyã 64 - WẼNNAAM SEBRE 2014

Ned sẽn kot Wẽnnaam tɩ b lill-a ne a bɛɛba

¹ A Davɩɩd yɩɩlle, yɩɩlã naab yĩnga.

² Mam Wẽnnaam, bɩ y kelg maam m wõosgã pʋga! Bɩ y gũ mam vɩɩmã ne bɛyã rabeem!

³ Bɩ y solg maam ne nin-wẽnsã saagrã, Zãag-y maam ne tʋʋm-wẽns maandbã.

⁴ Bãmb saasda b zɛlma wã wa zabr sʋʋga, bãmb tãooda b pɛɛmã sẽn yaa b gom-toosã.

⁵ Bãmb be b zĩigẽ n dat n tão burkĩnã. Bãmb soosd n tãood-a lame n ka yɛɛsdẽ ye.

⁶ Bãmb yẽsda ne taab n saagd saag-wẽnse. Bãmb gomdame tɩ b na n busa bẽdse, la b yetẽ: «Ãnda n tõe n yãnd bẽdsã?»

⁷ Bãmb seta wẽng sɛdg n yetẽ: «Tõnd sed n sɛɛme, tõnd magbã fãa pidame. Ninsaal tagsg yaa zulunga, ned ka tõe n bãng-a ye.»

⁸ La Wẽnnaam linga bãmb n tão peemde, la zĩig pʋgẽ, bãmb paama poglgo.

⁹ Bãmb zɛlma wã n wẽneg n lub-ba. Ned ning fãa sẽn yãnd-a bãmb gõmsda a zug n yaand-ba.

¹⁰ Rabeem yõka ninsaalbã fãa, bãmb moonda Wẽnnaam tʋʋmã. Bãmb na n wʋma Wẽnnaam tʋʋmã võore.

¹¹ Nin-tɩrg maanda sũ-noog Sẽn-Ka-Saab pʋga, la a soondg zĩig yaa bãmb nengẽ. Pʋ-peelem dãmbã na n maana sũ-noogo.