Yɩɩn‑sõamyã 62 - WẼNNAAM SEBRE 2014

Wẽnnaam bal n yaa zĩ-lilldga

¹ A Davɩɩd yɩɩlle, a Yedutun sẽn yɩɩle. Yɩɩlã naab yĩnga.

² N-yẽe! Yaa Wẽnnaam nengẽ bal la mam tar yam-gãnega. Mam fãagr yita bãmb nengẽ.

³ N-yẽe! Bãmb bal n yaa mam pĩiga, la m fãagda. Bãmb yaa mam pãng zĩiga. Mam kõn tol n miim ye.

⁴ Hal tɩ ta dabʋr la yãmb na n naag taab n digd nin-yɛnga, n baood n na n kʋ-a wa lalg sẽn kɩlle, la wa yãgr sẽn dat n lʋɩ?

⁵ N-yẽe! Bãmb baood n yiis-a-la a waoogrã zĩigẽ. Bãmb nonga zĩrẽ yagbo. Bãmb noyã ningda barka, tɩ b sũyã kãabd wẽnga.

⁶ N-yẽe! Yaa Wẽnnaam nengẽ bal la mam tar yam-gãnega! Bala, mam teegr yita bãmb nengẽ.

⁷ N-yẽe! Bãmb bal n yaa mam pĩiga, la m fãagda. B yaa mam pãng zĩiga, mam kõn tol n miim ye.

⁸ Mam fãagrã ne m ziirã bee ne Wẽnnaam. Wẽnnaam yaa mam pĩig sẽn kõt-m pãnga, la b yaa mam zĩ-soalgdga.

⁹ Bɩ nebã rɩk b teegrã n teeg Wẽnnaam wakat fãa! Pelg-y y pʋs Wẽnnaam taoore! Wẽnnaam yaa tõnd zĩ-soalgdga.

¹⁰ Ninsaal buud fãa wẽnda pemsem bala! B sã n mak ninsaalbã ne zɩslem makdga, b mikdame tɩ b yaa wa sobg bala! Bãmb fãa zɩslmã ka ta pemsem ye.

¹¹ Bɩ y ra teeg nen-kegl-tʋʋmã ye, la ra ning-y y tẽebã fãab pʋg ye. Yãmb paoong sã n paasdẽ, bɩ y ra bas tɩ y yamã loe ne-a ye.

¹² Wẽnnaam goma vugri, la mam leb n wʋma b sẽn gom naoor a yiibu: «Pãng yaa Wẽnnaam n so.»

¹³ Zu-soaba, nonglem me yaa yãmb dẽnda, bala, yãmb n keood ned kam fãa wa sẽn zems a tʋʋmã.