Yɩɩn‑sõamyã 60 - WẼNNAAM SEBRE 2014

Ned sẽn kot tɩ b fãag-a ne a bɛɛba

¹ A Davɩɩd yɩɩlle, zãmsg yĩnga. Yɩɩnda wa yɩɩll sẽn boond tɩ ‹rulg lɛlmã yaa kaseto.› Yaa yɩɩlã naab yĩnga.

² Yaa wakat ning a Davɩɩd sẽn zab ne Siiri rãmbã sẽn be Mezopotami ne Soba wã. Wakat-kãng yaa a Zoaab sẽn wẽnemd n kʋ Edom neb tus piig la a yiibã yamsem longã pʋgã.

³ Mam Wẽnnaam, yãmb basa tõndo, yãmb sãeega tõndo, yãmb sũur yikame. Leb-y n lebs-y tõnd d zĩigẽ.

⁴ Yãmb kɩtame tɩ tẽn-gãongã rigimdi, yãmb kɩtame t'a pãrge. Bɩ y maneg a zĩis nins sẽn pusã t'a miimdame!

⁵ Yãmb kɩtame tɩ to-kãsems paam y nebã, yãmb yũnuga tõnd reezẽ rãam sẽn yilimd nenga.

⁶ Yãmb kõo neb nins sẽn zoet-b yãmbã bãnde, tɩ b tõe n zoe n põs bɛyã pɛɛma,

⁷ tɩ yãmb nin-nongdsã tõe n paam yolsgo. Fãag-y tõnd ne y nug-rɩtgo, la y leok-do!

⁸ Wẽnnaam zĩnda b ro-sõngẽ wã n yeele: Mam na n tõogame, mam na n pʋɩɩ Sɩkɛm, la m mak Sukot tẽn-nabdrã.

⁹ Galaad ne Manaase yaa maam n so. Efrayiim yaa mam zabr pugla, la Zʋʋda yaa mam naam dasaare.

¹⁰ Moaab yaa sĩng mam sẽn tar n sood koom. Mam lobda m neoodr Edom zugu. Filistẽ-dãmba, kaas-y zabr kaasg n seg maam!

¹¹ Ãnda n na n tall maam n tɩ kẽes tẽng sẽn tar pãng pʋgẽ? Ãnda n na n tall maam n ta Edom?

¹² Mam Wẽnnaam, yãmb dag n ka bas tõnd sɩda? Mam Wẽnnaam, yãmb dag n ka bas n ka leb n yãagd tõnd tãb-biisã sɩda?

¹³ Bɩ y sõng-do, n yols-d ne d bɛyã! Ninsaalb fãagr yaa zaalem bala.

¹⁴ Wẽnnaam sã n be ne tõndo, tõnd na n maana tʋʋm-kãsemse. Yaa bãmb n na n sãam tõnd bɛɛbã.