Yɩɩn‑sõamyã 6 - WẼNNAAM SEBRE 2014

Ned sẽn kot tɩ Wẽnnaam zoe a nimbãanega

¹ A Davɩɩd yɩɩlle, yɩɩlã naab yĩnga. Yɩɩnda ne yʋʋm-teoog sẽn tar susi. Yaa ne pɛndg sẽn tar sus a nii.

² Sẽn-Ka-Saabo, ra sɩbg-y maam y sũ-yikrã pʋg ye. Ra sɩbg-y maam y sũ-puugrã pʋg ye.

³ Sẽn-Ka-Saabo, zoe-y mam nimbãaneg tɩ m pãngã sɛɛme. Sẽn-Ka-Saabo, maag-y maam, bala, mam kõabã rigdame.

⁴ Mam pɛlengã yɩkame. Sẽn-Ka-Saabo, na n yɩ a woto n ta dabʋre?

⁵ Sẽn-Ka-Saabo, lebg-y n wa-y n fãag-y-ma, yols-y maam y nonglmã yĩnga.

⁶ Bala, ned sẽn ki ka tõe n leb n tags yãmb yell ye. Kɩɩm-kulg pʋgẽ, ãnda n tõe n leb n pʋʋs yãmb barka?

⁷ Mam sidgrã kɩtame tɩ m pãng sɛ. Yʋng fãa, mam yãbda m gãagẽ, tɩ m gãagã madg ne m nintãmã.

⁸ Sũ-sãangã kɩtame tɩ mam ninã pãng booge. Mam bɛɛbã waooglem yĩng kɩtame tɩ m ninã yiigi.

⁹ Tʋʋm-wẽns maandbã fãa, zãag-y y mens ne maam, bala, Sẽn-Ka-Saab wʋma mam yãbrã rãamde.

¹⁰ Sẽn-Ka-Saab wʋma mam se-yõkrã, Sẽn-Ka-Saab sak n deega mam pʋʋsgã.

¹¹ Mam bɛɛbã fãa na n paama yãnd ne rabeem. Yãnd na n yõk-b-la zĩig pʋgẽ tɩ b targe.