Yɩɩn‑sõamyã 57 - WẼNNAAM SEBRE 2014

Ned sẽn kot tɩ b fãag-a a namsdbã nugẽ

¹ A Davɩɩd yɩɩlle. Yɩɩnda wa yɩɩll sẽn boond tɩ «ra sãam ye.» Yaa yẽnda sẽn wa n zoet n na n põs a Sayull tãngã bokẽ wã. Yaa yɩɩlã naab yĩnga.

² Mam Wẽnnaam, zoe-y mam nimbãanega! Mam Wẽnnaam, zoe-y mam nimbãanega! Bala, yãmb n yaa mam zĩ-soalgdga. Mam na n soonda yãmb pɩgsã maasmẽ. Mam na n paa beenẽ hal tɩ sãoongã looge.

³ Mam boonda Wẽnnaam Sẽn-Ka-To, Wẽnnaam ning sẽn maand bũmb fãa sõama n kõt maamã.

⁴ Baa ne mam bɛyã sẽn baood mam noor n namsd maamã, Wẽnnaam na n zĩnda yĩngr n fãag maam. Wẽnnaam na n tʋma b nonglmã ne b sɩdã mam yĩnga.

⁵ Mam bee gɩgma sʋka. Mam gãee nin-kʋʋdb sʋka. Bãmb yẽnã yaa wa kãna, la wa pɛɛma. Bãmb zɛlma wã yaa wa zabr sʋʋs sẽn dɩte.

⁶ Mam Wẽnnaam, kɩt-y tɩ y kãosengã yɩɩg saasẽ! Bɩ y kɩt tɩ y ziirã pid dũniyã gill fãa!

⁷ Bãmb gãnega bẽdg mam sorã zugu, mam sɩɩgã rag n namsda toog pʋga. Bɛɛbã tuu bok mam taoore, la bãmb mens n wẽneg n lʋɩ a pʋgẽ.

⁸ Mam Wẽnnaam, mam sũur keemame. Mam sũur keemame tɩ m na n yɩɩl ne yʋʋm-teed n pẽg yãmba.

⁹ Bɩ mam ziirã neke! Bɩ mam pɛndgã ne m duudgã neke! Mam na n kɩtame tɩ tõd-beoog neke!

¹⁰ Zu-soaba, mam na n pẽga yãmb bu-zẽmsã sʋka! Mam na n yɩɩl n waooga yãmb yʋʋr bu-zẽmsã sʋka.

¹¹ Bala, yãmb nonglmã zẽk n taa saasẽ, tɩ yãmb sɩdã zẽk n ta sawatã.

¹² Mam Wẽnnaam, kɩt-y tɩ y kãosengã yɩɩg saasẽ! Bɩ y kɩt tɩ y ziirã pid dũniyã gill fãa!