Yɩɩn‑sõamyã 56 - WẼNNAAM SEBRE 2014

Ned sẽn teeg Wẽnnaam

¹ A Davɩɩd yɩɩlle, yɩɩlã naab yĩnga. Yɩɩnda wa yɩɩll sẽn boond tɩ ‹wall sẽn zao Terebẽnt tɩɩs sẽn be yɩɩg zutu.› Yaa wakat ning Filistẽ-dãmbã sẽn wa n yõk yẽnda Gat tẽngã.

² Mam Wẽnnaam, zoe-y mam nimbãanega. Bala, nebã pʋgd n baooda mam noore. Bãmb zabda ne maam daar fãa, n namsd maam.

³ Daar fãa, mam bɛɛbã pʋgd n baooda mam noore. Sẽn wukd-b b mens n zabd ne maamã sõor yaa wʋsgo.

⁴ Rabeem sã n wa n tar maam daare, yaa yãmb la mam teeg yã.

⁵ Mam pẽgda Wẽnnaam b gomdã yĩnga, mam teega Wẽnnaam, n ka zoet rabeem ye. Ninsaalbã tõe n maana maam bõe?

⁶ Daar fãa, bɛɛbã golemda mam goamã. Bãmb sẽn tagsd n dat ne maam yaa wẽng bala.

⁷ Bãmb sorame n gũusd maam, bãmb gũusda maam m kẽnã pʋga. Bala, b baood n sãama mam vɩɩmã.

⁸ Bãmb tagsdame tɩ b wẽngã maaneg n na n kɩt tɩ b põs bɩ? Wẽnnaam, bas-y tɩ y sũ-puugrã lub-ba!

⁹ Yãmb mii mam zĩ-yeebdsã sõore. Bɩ y kok m nintãmã y ko-waoogẽ. Mam nintãmã yell ka gʋls yãmb sebrẽ wã sɩda?

¹⁰ Mam sã n kelem n bool-y daare, mam bɛɛbã tard n lebda poorẽ. Mam miime tɩ yãmb a Wẽnnaam bee ne-ma.

¹¹ Mam pẽgda Wẽnnaam b gomdã yĩnga. N-yẽe! Mam pẽgda Sẽn-Ka-Saab b gomdã yĩnga.

¹² Mam dɩka m teegrã n teeg Wẽnnaam, m ka zoet rabeem ye. Ninsaalbã tõe n maana maam bõe?

¹³ Mam Wẽnnaam, m na n pidsa m pʋlengã. Mam na n maana maand n pʋʋs yãmb m zaamẽ.

¹⁴ Bala, yãmb fãaga maam ne kũum. Yãmb sõnga maam tɩ m ka lʋɩ ye. Tɩ mam tõe n leb n kẽn yãmb taoore, n vɩɩmd nin-vɩɩsã sʋka.