Yɩɩn‑sõamyã 50 - WẼNNAAM SEBRE 2014

Wẽnnaam yaa bʋ-kaooda

¹ A Azaf yɩɩlle, Wẽnnaam yĩnga. Sẽn-Ka-Saab sẽn yaa wẽnnaamã gomdame n boond dũniyã rãmba, sẽn sɩng ne wĩntoog sẽn pukdẽ, n tãag wĩndg sẽn lʋɩtẽ.

² Wẽnnaam bee Sɩyõ tẽn-neerã pʋga, tɩ b vẽenemã yãgda.

³ Tõnd Wẽnnaamã watame, la bãmb ka na n sĩnd ye. Bugum dengda bãmb taoor n dɩtẽ, tɩ sob-kãseng gũbg bãmba.

⁴ Bãmb boonda yĩngr la tẽnga, b nebã bʋʋd kaoob yĩng n yetẽ:

⁵ Tigm-y mam nebã n kõ-ma, sẽn maan-b maoong n wilg tɩ b na n saka mam kaoolã!

⁶ Saasẽ na n moona bãmb tɩrlmã. Bala, yaa bãmb la bʋ-kaooda.

⁷ Mam nebã, kelg-y-yã! Mam na n gomame, Israyɛll nebã, kelg-y tɩ m na n bʋʋ ne yãmba. Mam yaa Wẽnnaam, m yaa yãmb Wẽnnaam.

⁸ Ka fo maandã yĩng la m sẽn lengd-fã ye. Fo maanda maoong sẽn yõogd bugum mam taoor wakat fãa.

⁹ Mam ka na n yõk loalg f yirã pʋga, la m kõn yõk boɛɛg f wubrẽ ye.

¹⁰ Bala, we-rũmsã fãa yaa maam n so, la tãmsã zut rũm-kʋʋngã fãa yaa maam n so.

¹¹ Mam mii tãmsã zut liuuli wã fãa, la weoogã rũms fãa yaa mam dẽnda.

¹² Kom sã n dag n tarẽ maam, mam dag n kõn togs foom ye. Bala, dũniyã ne bũmb nins fãa sẽn be a pʋgẽ wã yaa maam n so.

¹³ Rẽ yĩnga, mam wãbda lols nemd la? Bɩ mam yũuda boees zɩɩm?

¹⁴ Maoong fo sẽn tõe n maan Wẽnnaam yĩnga, yaa tɩ f pʋʋs-b barka, la f pids f pʋleng ne Sẽn-Ka-To.

¹⁵ Bool maam f yel-pakr wakate, tɩ mam na n fãaga foom, la fo na n waooga maam.

¹⁶ Wẽnnaam yeta nin-wẽng yaa: Fo sẽn sõdgd mam noyã yõod bee yɛ? Fo noorã togsda mam kaoolã,

¹⁷ la fo yaool n kisa remsgo, n lobd mam goamã f poorẽ!

¹⁸ Fo sã n yãnd wagdre, fo sũur nooma ne-a, la fo tɩ naaga yoaadba.

¹⁹ Fo tara f noorã n gomd wẽnga, tɩ f zelemdã wʋgd zãmbo.

²⁰ Fo zĩndidame n gomd f ba-biig wẽnga, fo sãamda f ma-biig yʋʋre.

²¹ Woto n yaa fo manesem, tɩ mam sĩnda. Fo tẽedame tɩ mam yaa wa foom? La ade, mam na n ninga foom taale, n vẽneg fãa n wilg-fu.

²² M kotame tɩ y wʋm bõn-kãens võore, yãmb dãmb sẽn yĩmd Wẽnnaam yellã, gũus-y tɩ m da wa tõos-y zeremse, tɩ ned ka be n na n fãag-y ye.

²³ Ned ning bark pʋʋsg sẽn yaa a maoong waoogda maam, la ned sã n gũusd ne a yel-manesem, mam na n kɩtame t'a yã Wẽnnaam fãagrã.