Yɩɩn‑sõamyã 5 - WẼNNAAM SEBRE 2014

Ned sẽn kot Sẽn-Ka-Saab tɩ b lill-a

¹ A Davɩɩd yɩɩlle, a bee yɩɩlã naab sebrẽ. Yɩɩnda ne wɩɩse.

² Sẽn-Ka-Saabo, kɩll-y y tʋbr n kelg m goamã, la y kelg m wõosgã!

³ Mam dĩmã, la mam Wẽnnaam, wʋm-y m sẽn kelemd n kot sõngrã! Bala, yaa yãmb la mam pʋʋsda!

⁴ Sẽn-Ka-Saabo, yibeoogo, yãmb wʋmda mam koɛɛgã. Yibeoog fãa, mam wata yãmb taoore, la m geta yãmba.

⁵ Bala, yãmb ka Wẽnnaam ning sẽn nong wẽngã ye. La wẽng ka tar zĩig yãmb nengẽ ye!

⁶ Wuk-m-mens rãmbã ka tõe n yals yãmb taoor ye. Yãmb kisa tʋʋm-wẽns maandbã fãa.

⁷ Yãmb kɩtdame tɩ zĩrẽ-be-rãmbã sãame. Sẽn-Ka-Saab kisa nin-kʋʋdbã ne zãmb dãmbã.

⁸ La yãmb nonglmã sẽn yaa kãseng ne maamã yĩnga, mam wata yãmb doogẽ wã, mam na n wõgemda yãmb do-sõngã taoor n waoog yãmba, yãmb sẽn zems waoogrã yĩnga.

⁹ Sẽn-Ka-Saabo, tɛ-y maam yãmb tɩrlmã pʋga, mam bɛɛbã yĩnga. Maneg-y sor ning yãmb sẽn dat tɩ m tũ wã.

¹⁰ Bala, sɩd ka be nin-bãmbã goamã pʋg ye. Bãmb sũyã pida ne sãoong tagsgo. Bãmb noyã goam yaa wa yao-vɩɩdo, la bãmb zɛlma wã gomda zãmb goamã.

¹¹ Mam Wẽnnaam, da bas-y-b taal ye. Kɩt-y tɩ b saagrã lebg bẽdg n lub-ba! Rig-y-b tɩ b looge, b tʋʋm-beedã sẽn yaa wʋsgã yĩnga. Bala, bãmb kɩɩsda yãmba!

¹² Neb nins fãa sẽn paam zĩ-soalgdg yãmb nengẽ wã na n maana sũ-noogo. Bãmb na n kaasa ne sũ-noog wakat fãa. Neb nins sẽn nong yãmb yʋʋrã, yãmb na n kogla bãmba, la bãmb na n kɩdma ne sũ-noogo!

¹³ Bala, yãmb a Sẽn-Ka-Saab ningda nin-tɩrg zug barka, la yãmb nonglmã gũbgda yẽnda wa gãongo.