Yɩɩn‑sõamyã 48 - WẼNNAAM SEBRE 2014

Sɩyõ tẽn-neerã ne a waoogre

¹ A Koore yagensã yɩɩlle.

² Sẽn-Ka-Saab yaa kãsenga, la b zemsa ne waoogre. Tõnd Wẽnnaamã tẽng pʋg sẽn yaa bãmb tãn-sõngã.

³ Kunkubrã tara ra-sãnde, a kõta dũniyã fãa sũ-noogo. Sɩyõ tãngã kɩreng ning sẽn teesd rɩtgã yaa rĩm-kãsengã tẽnga.

⁴ Wẽnnaam sã n be tẽngã na-yiy pʋse, b yaa pãng zĩiga.

⁵ Bala, rĩm-dãmbã rag n naaga taaba, n na n kẽng n tɩ zab ne Sɩyõ.

⁶ Bãmb gesame n yɛɛse, rabeem yõka bãmb tɩ b zoe.

⁷ Bãmb sɩnga rigb ne rabeem beenẽ, wa pag sẽn kũmd rogem,

⁸ tɩ wẽnd wa yaang sobg sẽn wãad Tarsɩɩs koom kogendo.

⁹ Tõnd sẽn wʋm bũmb ningã, tõnd yãnda bõn-kãng Sẽn-Ka-Saab sẽn yaa Saasẽ-Pãng-Soabã tẽngẽ, tõnd yãnd-a-la tõnd Wẽnnaamã tẽng pʋga. La yaa Wẽnnaam n yẽbg-a wakat fãa yĩnga.

¹⁰ Wẽnnaam, yãmb doogã pʋga, tõnd tagsda yãmb nonglmã yelle.

¹¹ Wẽnnaam, yãmb yʋʋrã sẽn yi to-to wã, Yãmb pẽgrã saaga dũniyã tɛk fãa me a woto. Yãmb nug-rɩtg pida ne tɩrlem.

¹² Sɩyõ tãngã maanda sũ-noogo, la Zʋʋda kom-pugli wã kɩdemdame, yãmb tɩrlem bʋ-kaoorã yĩnga.

¹³ Kẽn-y n gilg-y Sɩyõ tẽngã, n sõd a gãsdã.

¹⁴ Maag-y y meng n ges a lalsã sẽn gũbgã, la y ges a na-yiyã, n wa tõog n dɩk-a n togs zamaan ning sẽn watã.

¹⁵ Bala, Wẽnnaam-kãngã yaa tõnd Wẽnnaam wakat sẽn kõn sa. Bãmb n na n tɛ tõnd n tãag d yõor tɛka.