Yɩɩn‑sõamyã 42 - WẼNNAAM SEBRE 2014

Ned sẽn baood Wẽnnaam

¹ A Koore yagensã yɩɩlle, yɩɩlã naab yĩnga.

² Wa walg sẽn sesd n baood kʋɩlg koom to-to wã, mam sɩɩgã me sesda a woto n baood yãmb a Wẽnnaam!

³ Wẽnnaam ko-yũud tara maam, Wẽnnaam sẽn vɩ wã ko-yũud tara maame. Mam na n tɩ yalsa Wẽnnaam taoor dabʋre?

⁴ Wĩndg ne yʋngo, mam nintãm n lebg m dɩɩbo. Nebã sokda maam daar fãa yaa: «Fo Wẽnnaamã bee yɛɛnẽ?»

⁵ Mam sã n tags m vɩɩmã yelle, ad bũmb ning sẽn sɩɩsd mam sũur tɩ m ket n tẽegdẽ: Yaa mam sẽn dag n kẽnd ne kʋʋngã, n tũud-b n dabd Wẽnnaam doogẽ wã. Neb kʋʋng-kʋʋngã rag n kɩdemdame n pẽgd Wẽnnaam la b pʋʋsd-b barka.

⁶ Bõe yĩng tɩ m na n sãam m sũuri, n sidgdẽ? Mam na n maana tẽeb ne Wẽnnaam, mam na n leb n pʋʋsa bãmb barka, b sẽn fãag-ma yĩnga.

⁷ Mam Wẽnnaam, m sũur sãamame, rẽ kɩtame tɩ m na n zĩnd hal Zʋrdẽ kʋɩlgẽ wã, ne Hɛrmo la Mitseyaar tãngẽ wã, n tẽeg yãmb yelle.

⁸ Zĩ-zulung koom takda zĩ-zulung a to koom tɩ b zoet n yekd taaba, yãmb ko-wĩisã fãa ne y ko-pɛmã looga mam zugu.

⁹ Wĩndga, Sẽn-Ka-Saab wilgda maam b nonglem-kãsengã, la yʋngo, mam na n yɩɩla bãmb yĩnga. Mam pʋʋsda Wẽnnaam ning sẽn so mam vɩɩmã.

¹⁰ Mam sokda Wẽnnaam sẽn yaa mam pĩigã yaa: Bõe yĩng tɩ yãmb yĩm m yelle? Bõe yĩng tɩ y bas-m tɩ m kẽnd ne sũ-sãanga, tɩ m bɛyã tar maam n namsdẽ?

¹¹ Mam kõabã kaoome, mam zabd-n-taasã paoogd-m-la daar fãa n yetẽ: «Fo Wẽnnaamã bee yɛɛnẽ?»

¹² Bõe yĩng tɩ m na n sãam m sũuri, n sidgdẽ? Mam na n maana tẽeb ne Wẽnnaam, mam na n leb n pʋʋsa bãmb barka, bãmb la m Wẽnnaam, la m fãagda.