Yɩɩn‑sõamyã 41 - WẼNNAAM SEBRE 2014

Ned sẽn pʋʋsd n kot maagre

¹ A Davɩɩd yɩɩlle, yɩɩlã naab yĩnga.

² Bark bee sẽn tagsd-a pãn-komsem soab yell zugu! Bala, toog wakate, Sẽn-Ka-Saab fãagda yẽnda.

³ Sẽn-Ka-Saab na n gũu yẽnda, n kɩt t'a vɩɩmde. Yẽnda na n paama sũ-noog dũniyã zugu. Sẽn-Ka-Saab kõn sak t'a bɛɛbã maan b sẽn dat ne-a ye.

⁴ Yẽnda sã n wa n gãe ne toogo, Sẽn-Ka-Saab tebended-a lame. A sã n wa gãe ne bãaga, Sẽn-Ka-Saab sõngd-a lame.

⁵ Mam yetame: «Sẽn-Ka-Saabo, zoe-y mam nimbãaneg n maag-ma, bala, maam n beeg yãmba.»

⁶ Mam bɛɛbã gomda mam yell wẽnga, n yetẽ: «Dabʋr la a na n ki? Dabʋr la a yʋʋrã na n meneme?»

⁷ M bɛɛbã nin-yɛng sã n wa n na n ges-ma, a gomda zĩrẽ-be-goamã. A sũurã pida ne wẽng bala. Yẽnda sã n yi, yaa rẽnda yell la a tar goam soayã zutu.

⁸ Sẽn kis-b maamã fãa seta ne taab n dat n maan maam wẽnga. Bãmb segend n dat n maana maam wẽnga.

⁹ Bãmb yetame: «Ad yaa bã-wẽng n tar-a. A sẽn gãe wã, a kõn leb n yik ye!»

¹⁰ Baa ned ning sẽn dag n yaa mam zoa wã, tɩ mam kɩs sɩd ne-a, la sẽn dag n dɩt-a ne maamã, wẽneg n kisga maam.

¹¹ Sẽn-Ka-Saabo, zoe-y mam nimbãanega, la y sõng-m tɩ m leb n yiki! Mam na n lebs-b-la wa sẽn zems b tʋʋmã.

¹² Yaa a woto la m na n bãng tɩ y nong-m lame. Bala, mam bɛ wã kõn tol n leb n kɩdem ne sũ-noog a sẽn tõog maamã yĩng ye.

¹³ La maam, yãmb sõnga maam m burkĩndã pʋga, n kɩt tɩ m be yãmb taoor wakat fãa.

¹⁴ Bɩ Sẽn-Ka-Saab sẽn yaa Israyɛll Wẽnnaamã paam pẽgr wakat sẽn kõn sɛ! Ãmina! Ãmina!