Yɩɩn‑sõamyã 40 - WẼNNAAM SEBRE 2014

Ned sẽn kot fãagre

¹ A Davɩɩd yɩɩlle, yɩɩlã naab yĩnga.

² Mam maana tẽeb ne Sẽn-Ka-Saabo. La bãmb sulgame n wʋm m kɛlengã.

³ Bãmb yiisa maam sãoong bok pʋga, la b yiis-m begdã pʋgẽ. Bãmb kɩtame tɩ mam naoã yals pĩig zugu, n kɩt tɩ m kẽnd ne pɛl-kɛgenga.

⁴ Bãmb ninga yɩɩn-paalg mam noorẽ, yaa tõnd Wẽnnaamã pẽgr yɩɩlle. Neb wʋsg na n yãnda bãmb tɩ rabeem yõk-ba, la b na n dɩka b teegrã n teeg Sẽn-Ka-Saabo.

⁵ Bark bee ned ning sẽn teegd Sẽn-Ka-Saabã zugu, ned ning sẽn ka wẽnemded n tũ tɩta-nebã, la sẽn ka naagd-a zĩrẽ-be-rãmbã!

⁶ Sẽn-Ka-Saab sẽn yaa mam Wẽnnaam, yãmb maana bõn-bãn wʋsgo, wa sẽn zems saagr ning yãmb sẽn tar tõnd yĩngã. Yãmb ka tol n tar mak-n-taag ye. Mam na n togsa bõn-kãnga, n leb n moon-a. Y tʋʋm-kãsemsã sõor yaa wʋsg tɩ ka tõe n sõd n sɛ ye.

⁷ Ka maoongo, wall kũun la yãmb nong ye. Yãmb yoka mam tʋba. Ka maoong sẽn yõogd bugum, wall yel-wẽnã sugr kũun maoong la yãmb dat ye.

⁸ Dẽ, mam yeelame yaa: «Ade, mam wata ne seb-pindgã b sẽn gʋls mam yĩngã.»

⁹ Mam Wẽnnaam, mam dat n maana yãmb daabo, la m bĩng yãmb tõogã m sũurẽ.

¹⁰ Mam togsa tɩrlem koe-noogã kʋʋn-kãseng sʋka. Ade, Sẽn-Ka-Saabo, yãmb meng miime, tɩ mam ka sĩnd m noor ye.

¹¹ Mam ka solgd yãmb tɩrlmã m sũurẽ ye. Mam gomda yãmb pʋ-peelmã ne y fãagrã yelle. Mam ka solgd kʋʋn-kãsengã yãmb nonglmã ne y sɩdã ye.

¹² Sẽn-Ka-Saabo, yãmb ka na n mong maam y nimbãan-zoeerã ye. Yãmb nonglmã ne y sɩdã na n yãaga maam wakat fãa.

¹³ Bala, tood sẽn ka tar sõor n gũbg maam. Mam yel-wẽnã pʋgda maam, tɩ mam ninã ka leb n tõe n ges-b ye. B sõorã yɩɩda mam zugã zoobdo, la mam daooda boogdame.

¹⁴ Sẽn-Ka-Saabo, m kotame tɩ y fãag-ma! Sẽn-Ka-Saabo, wa-y tao-tao n wa sõng-ma!

¹⁵ Bɩ yãnd yõk sẽn baood-b n sãam mam vɩɩmã! Kɩt-y tɩ bãmb fãa paam yãnd ne paoogre! Bɩ yãnd yõk sẽn baood-b maam ne wẽngã tɩ b tar n leb poorẽ!

¹⁶ Bɩ sẽn laad-b maamã rɩ yãnde, tɩ b sũyã sãame!

¹⁷ Bɩ neb nins fãa sẽn baood yãmbã paam sũ-noog n kɩdem yãmb pʋgẽ! Bɩ sẽn nong-b yãmb fãagrã yeel wakat fãa yaa: Sẽn-Ka-Saab yaa kãsenga!

¹⁸ Mam yaa naong soaba, la nimbãan-neda. La Zu-soabã tagsda mam yelle. Zu-soaba, yãmb yaa mam sõangda, la m fãagda. Mam Wẽnnaam bɩ y ra kaoos ye!