Yɩɩn‑sõamyã 4 - WẼNNAAM SEBRE 2014

Ned sẽn pʋʋsd yʋngo

¹ A Davɩɩd yɩɩle, yɩɩlã naab yĩnga. Yɩɩnda ne yʋʋm-teed sẽn tar susi.

² Wẽnnaam sẽn yaa mam tɩrlem soaba, mam sã n kelem n bool-y-yã, bɩ y leok-ma! Mam sã n wa be yel-pakr pʋga, yãmb yolsda maam. Zoe-y mam nimbãanega, la y leok m kosgã!

³ Yãmb a ninsaalb kamba, yãmb na n paooga maam hal tɩ ta dabʋre? Yãmb na n nonga sẽn ka tar yõodã tɩ ta dabʋre? Yãmb na n kell n nonga zĩrẽ-beedã?

⁴ Bãng-y tɩ Sẽn-Ka-Saab welgda b nin-nongrã toore. La mam sã n kelem n bool Sẽn-Ka-Saabo, bãmb wʋmdame.

⁵ Baa yãmb sũyã sã n yiki, bɩ y ra maan yel-wẽnã ye. Yãmb sã n wa gãe y gãagẽ, bɩ y tags y sũurẽ, la y sĩnd y noore.

⁶ Maan-y tɩrlem maando, la y teeg Sẽn-Ka-Saabo.

⁷ Neb wʋsg yetame: «Ãnda n na n sõng-d tɩ d paam naare?» Sẽn-Ka-Saabo, kɩt-y tɩ y nengã vẽenem yãg n bui tõndo!

⁸ Yãmb kõta maam sũ-noog n yɩɩd sũ-noog ning nin-bãmbã sẽn wat n tar b koodã sẽn yaa wʋsgã, ne b reezẽ rã-paalg sẽn yaa wʋsgã wakatã.

⁹ Mam sã n gãe m gãagẽ, mam gõee ne bãane. Bala, yãmb a Sẽn-Ka-Saab bal n kɩtd tɩ mam vɩ n ka yɛɛsd bũmb ye.