Yɩɩn‑sõamyã 38 - WẼNNAAM SEBRE 2014

Ned sũur sẽn sãam ne a kongre

¹ A Davɩɩd yɩɩlle, tẽegr yĩnga.

² Sẽn-Ka-Saabo, ra-y sɩbg-y maam y sũ-yikrã pʋg ye. La y ra leng maam y sũ-puugrã pʋgẽ ye!

³ Bala, yãmb pɛɛmã yõga maam. Yãmb nugã wẽe maam.

⁴ Yãmb sũ-puugrã kɩtame tɩ mam yĩngã zãng tar toogo. Mam beegrã yĩnga, mam kõabã ka leb n tar laafɩ ye.

⁵ Bala, mam yel-wẽnã zãntlem yɩɩda m zugã woglem, la a lebga zɩɩbo, n zɩsg maam hal wʋsgo.

⁶ Mam noadã põogame tɩ yũugã yita, la yaa mam yalemdã yĩnga.

⁷ Mam gõdame n zĩ ne sũ-sãan-kãsenga. Daar fãa, mam bee sũ-sãang pʋga, wa m ned n ki.

⁸ Bala, mam pʋgã fãa wɩnga basɩ, tɩ mam yĩngã fãa tar toogo.

⁹ Mam ka leb n tar pãng ye. Mam gĩinã fãa maaga zãnga. Mam sũ-sãangã kɩtame tɩ m sidgdẽ.

¹⁰ Zu-soaba, yãmb mii mam datmã fãa, la mam sidgrã ka solg ne yãmb ye.

¹¹ Mam sũurã kiuusdame, tɩ m pãngã sɛtẽ. Mam ninã pãng boogdame.

¹² Mam noadã yĩnga, m zo-rãmbã ne m tũud-n-taasã tard n lebda kɛɛnga. Mam doagdbã zãagda b mens ne maam.

¹³ Sẽn dat-b n sãam mam vɩɩmã bẽta maam. Sẽn dat-b maam ne wẽngã gomda maam n kãnegd maam la b gomd zãmb goam ne maam daar fãa.

¹⁴ La mam lebga wa wʋnga, n ka leb n wʋmdẽ ye. Mam lebga wa muka, n ka leb n gomd ye.

¹⁵ Mam lebga wa ned sẽn ka wʋmde, n ka tar m sẽn na n leok ye.

¹⁶ Sẽn-Ka-Saabo, yaa yãmb la m geta, Mam Zu-soab a Wẽnnaam, yaa yãmb n na n leok n kõ-ma.

¹⁷ Bala, mam kosa yãmb n yeel yaa: «Ra bas-y tɩ b maan sũ-noog mam wɛɛngẽ ye. Ra bas-y tɩ b wuk b mens m naoorã sẽn wat n lakã ye.»

¹⁸ Bala, mam dat n lʋɩɩme, la toog tar-m-la daar fãa.

¹⁹ Bala, mam vẽneg n togsa m kongrã, mam sũur sãama m yel-wẽnã yĩnga.

²⁰ Mam bɛɛbã fĩisda ne pãnga. Sẽn kis-b maam zaalmã sõor yaa wʋsgo.

²¹ Neb nins mam sẽn maan-b neer tɩ b lebsd maam wẽngã zabda ne maam, mam sẽn baood n maan-neer yĩnga.

²² Sẽn-Ka-Saabo, ra bas-y maam ye! Mam Wẽnnaam, da zãag-y y meng ne maam ye!

²³ Wa-y tao-tao n wa sõng-ma, Zu-soaba, yãmb la mam fãagda!