Yɩɩn‑sõamyã 36 - WẼNNAAM SEBRE 2014

Sẽn-Ka-Saab nonglem yɩɩlle

1 Yaa Sẽn-Ka-Saab tʋmtʋmd a Davɩɩd yɩɩlle,

¹ Yaa Sẽn-Ka-Saab tʋmtʋmd a Davɩɩd yɩɩlle, yɩɩlã naab yĩnga.

² Nin-wẽngã kɩɩsg gomdã paa mam sũurẽ, yẽnda ka zoet Wẽnnaam ye.

³ Yẽnda belgda a menga, n ka sakd n deeg a kongr n kisg-a ye.

⁴ Yẽnda noorã goam yaa wẽng la zãmbo. Yẽnda zãgsa sẽn yaa sõama, n ka rat n maan neer ye.

⁵ Yẽnda sã n gãe, a tagsda wẽng maaneg bala, yẽnda ka tũud so-sõng ye, yẽnda ka zãgsd wẽng maaneg ye.

⁶ Sẽn-Ka-Saabo, yãmb nonglmã bee hal saasẽ, la yãmb pʋ-peelmã tata hal sawatẽ.

⁷ Yãmb tɩrlmã zãntlem wẽnda Wẽnnaam tãmse. Yãmb bʋ-kaoorã zulum yɩɩda ko-kãsemse. Sẽn-Ka-Saabo, yãmb n fãagd ninsaalb ne rũmsi.

⁸ Mam Wẽnnaam, yãmb nonglmã tara yõod wʋsgo, ninsaalbã soondeda yãmb pɩgsã maasmẽ.

⁹ Yãmb doogã pida ne rɩɩbo, tɩ b rɩt n tɩgda, la yãmb kõt-b-la y sõmblem ko-noogã tɩ b yũuda.

¹⁰ Bala, vɩɩm ko-bundum bee yãmb nengẽ. Yãmb vẽenemã pʋgẽ tõnd tõe n yãa vẽenem.

¹¹ Kɩt-y tɩ sẽn mi-b yãmbã tɩg ne y nonglmã, la y kɩt tɩ yãmb tɩrlmã zĩnd pʋ-peelem-dãmbã zutu.

¹² Bɩ wuk-m-meng soabã naoor ra tabg m nengẽ ye. La bɩ nin-wẽnsã nug ra tõog n dig maam ye!

¹³ Yaa beenẽ la tʋʋm-wẽns maandbã lʋɩta. B leeba bãmb n lubi, la b kõn leb n yik ye!