Yɩɩn‑sõamyã 35 - WẼNNAAM SEBRE 2014

Ned sẽn kot Sẽn-Ka-Saab tɩ b fãag-a

1 A Davɩɩd yɩɩlle.

¹ A Davɩɩd yɩɩlle. Sẽn-Ka-Saabo, yɩ-y mam bɛɛbã bɛ, Zab-y ne sẽn zabd-b ne maamã!

² Bɩ y rɩk y gãongã ne y gãntikã, n yik n zab n sõng-ma!

³ Zẽk-y y kãndã ne y kãn-dibgã n seg m namsdbã! Yeel-y maam yaa: «Mam n yaa fo fãagre!»

⁴ Kɩt-y tɩ sẽn dat-b n yiis mam vɩɩmã paam paoogr ne yãnde! Bɩ sẽn dat-b n maan maam wẽngã targ n dɩ yãnde!

⁵ Bɩ Sẽn-Ka-Saab malɛɛkã rig-ba, tɩ b loog wa sobg sẽn dɩkd wudgu!

⁶ Sẽn-Ka-Saab malɛɛkã sã n wa rigd-ba, bɩ b sorã lebg lik bida, la salse.

⁷ Bãmb bẽda maam ne tãoog tɩ m ka maan-b bũmb ye, bãmb tuu bok n dat n kʋ maam zaalem.

⁸ Bɩ sãoong ling n sãam-ba. Bɩ bẽdg ning b sẽn bẽdã wẽneg n yõk-ba, bɩ b lʋɩ bok ning b sẽn tu wã pʋgẽ, la bɩ b paam namsgo.

⁹ Mam na n maana sũ-noog Sẽn-Ka-Saab pʋga, mam na n kɩdma bãmb fãagrã yĩnga.

¹⁰ Mam na n yeela ne m sũur fãa yaa: «Sẽn-Ka-Saabo, ãndã n zem yãmba, n tõe n fãag ka-pãng soab pãng soab nugẽ, la sẽn tõe n fãag naong soab ne nimbãan-ned b fãadbã nugẽ?»

¹¹ Zĩrẽ kaset dãmb n yik n sokd maam yɛl m sẽn ka mi tiiri.

¹² Mam maand-b-la neere, tɩ b lebsd maam wẽnga. Mam lebga m yembr tãa.

¹³ La ne maam, bãmb ka-laafɩ wakate, mam yeelga sũ-sãang fuug n maan sũ-sãanga, mam sika m meng n loe noore, la m pʋʋsdame n ka basdẽ ye.

¹⁴ Mam dag n saad n yilimda wa ned sẽn maand a zoa bɩ a ba-biig yĩnga. Mam dag n bee sũ-sãang pʋg wa m ma n ki.

¹⁵ Mam sã n lʋɩ, bãmb tigimda taab n kɩdemdẽ, bãmb tigimda taab n dat n ling n zab ne maam. Sẽn pãbd-b maamã namsda maam n ka basdẽ ye.

¹⁶ Bãmb naaga nin-paoogdbã ne wẽn-kɩɩsdbã, n wãbd b yẽn n dat maam ne wẽnga.

¹⁷ Zu-soaba, yãmb na n sĩnd n geta yel-kãngã hal tɩ ta dabʋre? Kogl-y maam tɩ m põs b sẽn namsd maamã, fãag-y m vɩɩmã ne gɩgem-poalã.

¹⁸ Mam na n pʋʋsa yãmb bark kʋʋngã sʋka. Mam na n pẽga yãmb neb wʋsg sʋka.

¹⁹ Bɩ mam bɛɛbã sẽn kis maam zaalmã ra kɩdem mam wɛɛngẽ ye. Bɩ neb nins sẽn kis-b maam zaalmã ra ges maam n wẽgs b nin ye!

²⁰ Bala, bãmb ka tol n gomd n baood vɩ-bãan ye, bãmb saagda zãmb saagr tẽngã neb nins sẽn vɩ-b ne bãanã wɛɛngẽ.

²¹ Bãmb yaaga b noor n paoogd maam n yetẽ: N-faa! N-faa! Tõnd nif yãnd-a lame.

²² Sẽn-Ka-Saabo, yãmb yãnd-a lame, ra-y sĩnd-y y noor ye! Zu-soaba, ra-y zãag-y y meng ne maam ye!

²³ Mam Wẽnnaam, la m Zu-soaba, yik-y-yã! Yik-y n wilg-y tɩ m tara bʋʋm. Yik-y n zab-y n sõng-y-ma!

²⁴ Mam Wẽnnaam Sẽn-Ka-Saabo, bʋ-y m bʋʋdã wa sẽn zems y tɩrlmã! Bɩ nin-bãmbã ra maan sũ-noog mam wɛɛngẽ ye!

²⁵ Bɩ bãmb da wa yeel b sũyã pʋs tɩ: «Yaa woto bal la tõnd sẽn dag n datã!» Bɩ bãmb ra wa yeel tɩ: «Tõnd vel-a lame!»

²⁶ Bɩ sẽn maand-b sũ-noog mam toogã yĩngã naag taab n paam yãnd ne paoogre. Bɩ neb nins sẽn tagsd tɩ b yɩɩda maamã rɩ yãnde, la b paam paoogre!

²⁷ Bɩ neb nins sũy sẽn noom ne mam tɩrlmã, kaas n maan sũ-noog n kɩdme. La bɩ b yeel wakat fãa yaa: «Sẽn-Ka-Saab yaa kãsenga, bãmb sũur nooma ne b tʋmtʋmdã sẽn vɩ-bãanã.»

²⁸ Mam zelemd na n togsa yãmb tɩrlmã ne y pẽgrã daar fãa!