Yɩɩn‑sõamyã 34 - WẼNNAAM SEBRE 2014

Ned sẽn pẽgd Wẽnnaam b yolsg yĩnga

¹ A Davɩɩd yɩɩlle. Yaa a sẽn wa n toeem a meng n maan wa gãeeng a Abimelɛk taoore, t'a Abimelɛk rig-a t'a loogã.

² Mam na n pẽga Sẽn-Ka-Saab wakat fãa, mam noorã na n pẽgda bãmb wakat fãa.

³ Mam na n kɩdma ne Sẽn-Ka-Saabo! Naong rãmbã sã n wʋme, b maanda sũ-noogo!

⁴ Naag-y maam n balem Sẽn-Ka-Saabo! D lagem taab n zẽk bãmb yʋʋrã!

⁵ Mam baoo Sẽn-Ka-Saabo, la bãmb leoka maam. Mam dabeemã fãa pʋga, bãmb fãaga maam.

⁶ Sẽn get-b bãmbã nens pɩndame, la yãnd ka tol n be b nensẽ ye.

⁷ Naong soab sã n kelme, Sẽn-Ka-Saab wʋmdame, la b fãagd-a-la yel-pakr buudã fãa pʋga.

⁸ Sẽn-Ka-Saab malɛɛkã gũuda sẽn zoet-b bãmbã, n fãagd-ba.

⁹ Lemb-y n ges-y n bãng tɩ Sẽn-Ka-Saab yaa noogo! Bark bee ned ning sẽn soonded Sẽn-Ka-Saab nengẽ wã zugu!

¹⁰ Bɩ neb nins sẽn welg toor Sẽn-Ka-Saab yĩngã zoe bãmba! Bala, bũmb kõn tol n paoog sẽn zoet-b bãmbã ye.

¹¹ Far ne kom tõe n yõka gɩgem-bi, la bũmb kõn tol n paoog neb nins sẽn baood Sẽn-Ka-Saabã ye.

¹² Mam kamba, wa-y n kelg-y maam! Mam na n zãmsa yãmb tɩ y zoe Sẽn-Ka-Saabo.

¹³ Ãnda soab n dat n paam vɩɩmã sũ-noogo, la a nong n paam yõ-wok ne naare?

¹⁴ Bɩ f gũus tɩ f zelemd da gom wẽnga, la f noor da gom zãmb goam ye.

¹⁵ Zãag f meng ne wẽnga, n maan neere, bao vɩ-bãane, n maan bũmb sẽn wat ne-a.

¹⁶ Sẽn-Ka-Saab ninã bee nin-tɩrsã zutu, la b sã n bool bãmb n kos sõngre, b kelgd-b lame.

¹⁷ Sẽn-Ka-Saab wẽnemdeda b neng n bas tʋʋm-wẽns maandbã, n na n kɩt tɩ b yʋʋr menem dũniyã zugu.

¹⁸ La nin-tɩrsã sã n kelme, Sẽn-Ka-Saab wʋmdame, la b fãagd-b-la b yel-pakrã fãa pʋga.

¹⁹ Sẽn-Ka-Saab pẽe sũ-sãang rãmbã, la b fãagda sũ-pa-noaang rãmbã.

²⁰ Nin-tɩrg tõe n paama tood wʋsgo, la Sẽn-Ka-Saab n fãagd yẽnda to-kãens fãa pʋga.

²¹ Bãmb gũuda b nin-tɩrgã kõbr fãa, la a kõbr ba a yembr kõn kaoog ye.

²² Toog na n kʋʋ nin-wẽnga, la sẽn kis-b nin-tɩrgã na n paama sɩbgre.

²³ Sẽn-Ka-Saab fãagda b tʋmtʋmdbã. La neb nins fãa sẽn na n soond Sẽn-Ka-Saab nengẽ wã ba a yembr ka na n paam sɩbgr ye.