Yɩɩn‑sõamyã 33 - WẼNNAAM SEBRE 2014

Wẽnnaam yaa naanda, la fãagda

¹ Nin-tɩrse, kaas-y ne sũ-noog Sẽn-Ka-Saab yĩnga! Zemsame tɩ nin-tɩrsã pẽg Sẽn-Ka-Saabo.

² Wẽ-y pɛndg n pʋʋs Sẽn-Ka-Saab barka, wãag-y ruudg sẽn tar sus piig n pẽg bãmba.

³ Yɩɩl-y yɩɩn-paalg n pẽg bãmba! Tall-y y yʋʋm-teedã n maan noog n pẽg-ba.

⁴ Bala, Sẽn-Ka-Saab gomdã yaa tɩrga. Bãmb tʋʋmã fãa yaa sɩda.

⁵ Bãmb nonga tɩrlem ne zemsgo. Sẽn-Ka-Saab nonglmã pida dũniyã gilli.

⁶ Sẽn-Ka-Saab gomdã n naan saasã, la b noorã pemsem n naan tãb-biisã yĩngrã fãa.

⁷ Bãmb tigsda ko-kãsengã koom zĩ-yɛnga, la b bĩngd zĩ-zulumsẽ koomã ko-bao pʋsẽ.

⁸ Bɩ dũniyã gill zoe Sẽn-Ka-Saabo! Bɩ dũniyã nebã fãa rig bãmb taoore!

⁹ Bala, bãmb sã n yeel bũmbu, a pidsdame. Bãmb sã n kõ noor tɩ bũmb zĩndi, a zĩndidame.

¹⁰ Sẽn-Ka-Saab n tõe n kɩt tɩ nebã saagr lʋɩ vɩʋʋgẽ, bãmb n gɩdgd ninsaalbã sẽn dat n maan bũmb ninsã.

¹¹ Sẽn-Ka-Saab saagr ka tol n viigdẽ ye. La bãmb sũur tagsg paada zamaan woo zamaane.

¹² Bark bee soolem ning sẽn tar Sẽn-Ka-Saab tɩ yaa a Wẽnnaamã zugu! Bark bee Sẽn-Ka-Saab sẽn yãk neb nins tɩ yaa b rẽndã zutu!

¹³ Sẽn-Ka-Saab bee saasẽ n getẽ, la b nee ninsaalbã fãa,

¹⁴ b bee b zĩigẽ n get dũniyã nebã fãa.

¹⁵ Bãmb n maan ninsaalbã fãa sũyã, la b mii ninsaalbã tʋʋmã fãa.

¹⁶ Ka rĩm tãb-bi-kʋʋng n fãagd-a ye. La ka gãndaoog yãoog pãng n fãagd-a ye.

¹⁷ Ned sã n yeel tɩ wed-moaag n kõt fãagre, ka sɩd ye. Wed-moaag ne a pãngã fãa, a ka tõe n yols ned ye.

¹⁸ Ade, Sẽn-Ka-Saab nif bee sẽn zoet-b bãmbã zugu, b nif bee sẽn tẽed-b bãmb nonglmã zugu,

¹⁹ sẽn na n yɩl n fãag bãmb ne kũum, la b sõng-b tɩ b vɩɩmd kom wakate.

²⁰ Tõnd teega Sẽn-Ka-Saabo. Bãmb yaa tõnd sõangda, la d gãongo.

²¹ N-yẽe! Tõnd maanda sũ-noog ne bãmba, tɩ bala, tõnd teega bãmb yʋ-sõngã.

²² Sẽn-Ka-Saabo, bɩ yãmb nonglmã zĩnd tõnd zutu, wa tõnd sẽn tẽed yãmbã.