Yɩɩn‑sõamyã 31 - WẼNNAAM SEBRE 2014

Ned sẽn teeg Sẽn-Ka-Saabo

¹ A Davɩɩd yɩɩlle, yɩɩlã naab yĩnga.

² Sẽn-Ka-Saabo, yãmb yaa mam zĩ-soalgdga. Bɩ y ra sak tɩ mam paam yãnd abada ye. Fãag-y maam y tɩrlmã pʋga.

³ Kɩll-y y tʋbr n kelg-ma, la y fãag-m tao-tao! Bɩ y yɩ mam pĩig sẽn tar pãnga, la m pãng zĩiga, tɩ mam tõe n paam fãagre!

⁴ Bala, yaa yãmb la mam pĩiga, la m pãng zĩiga. Yãmb na n tɛɛ maam, la y wilg maam sore, yãmb yʋʋrã yĩnga.

⁵ Yãmb na n yiisa maam bẽdg ning b sẽn bẽd maamã pʋgẽ. Bala, yãmb yaa mam pãng zĩiga.

⁶ Mam basda m vɩɩmã yãmb nugẽ. Sẽn-Ka-Saab sẽn yaa sɩd Wẽnnaam, yãmb fãaga maam.

⁷ Mam kisa sẽn pʋʋsd-b wẽn-naands sẽn ka yõodã. La maam, mam teega Sẽn-Ka-Saabo.

⁸ Mam kɩdemdame n maand sũ-noog yãmb nonglmã pʋga. Bala, yãmb nee mam nimbãanegã, la yãmb mii mam yel-pakrã.

⁹ Yãmb ka bas maam m bɛɛbã nusẽ ye. La yãmb kɩtame tɩ mam nao kẽnd ne lohorem.

¹⁰ Sẽn-Ka-Saabo, zoe-y mam nimbãanega, bala, mam bee yel-pakr pʋga. Mam yãbame tɩ m ninã pãng booge, tɩ m sɩɩgã ne m yĩngã pãng sɛ.

¹¹ Mam vɩɩmã bee sũ-sãang pʋga, tɩ sidgrã boogd mam yʋʋmã. Mam kongrã kɩtame tɩ m pãngã sɛtẽ. La mam kõaba fãa sãamdame.

¹² Mam bɛɛbã fãa tara maam n tʋʋda, la m yagsã n paoogd maam n yɩɩda. Mam zo-rãmbã sã n yãnd maam, kõt-b-la rabeem. Sẽn yãt-b maam yɩngã zoet n zãagda ne maam.

¹³ B yĩma mam yell wa ned sẽn ki, mam lebga wa bũmb sẽn meneme.

¹⁴ Mam wʋmda tẽn-kãnem goam wʋsgo, lebga rabeem n gũbg maam zĩig fãa! Bãmb seta ne taab n dat n sãam maam, Bãmb yẽsda ne taab n dat n sãam mam vɩɩmã.

¹⁵ Maam, mam dɩka m teegrã n teeg yãmb a Sẽn-Ka-Saabo! Mam yetame: «Yãmb yaa mam Wẽnnaam!»

¹⁶ Mam vɩɩmã bee yãmb nugẽ wakat fãa. Fãag-y maam m bɛɛbã ne m namsdbã nusẽ.

¹⁷ Kɩt-y tɩ y nengã vẽenem yãg n bui mam sẽn yaa yãmb tʋmtʋmdã. Fãag-y maam y nonglmã pʋga!

¹⁸ Sẽn-Ka-Saabo, mam sã n bool-yã, bɩ y ra sak tɩ m paam yãnd ye. Kɩt-y tɩ yãnd yõk nin-wẽnsã, la y kɩt tɩ b sig kɩɩm-kulg sɩddd...

¹⁹ Kɩt-y tɩ zĩrẽ-be-nebã noy mume. Bãmb gomda tɩta-goamã, wuk-m-men-goamã, la paoogr goam n dõt nin-tɩrga!

²⁰ Yãmb sõmblmã yaa kãsenga, yãmb bĩng-a-la neb nins sẽn zoet yãmbã yĩnga. Ninsaalbã nifẽ, yãmb maanda neb nins sẽn solgd yãmb nengẽ wã neere!

²¹ Yãmb solga y nebã y belmã pʋga n zãag-b ne ninsaalbã sɩlem-wẽnsã. Yãmb solg-b-la zĩ-soalgdgẽ, tɩ b põs ninsaalbã zelem-toosã.

²² Bɩ Sẽn-Ka-Saab paam pẽgre! Bãmb wilga b nonglem-kãsengã mam yĩnga, wa tẽng b sẽn me n gũbgi.

²³ La maam, m yãgbã pʋga, mam yeelame: Yãmb diga maam n zãag ne y menga. La baoosgo, mam sẽn kelem n bool yãmb tɩ y sõng-ma, yãmb wʋma mam kosgã.

²⁴ Yãmb fãa sẽn yaa Sẽn-Ka-Saab nebã, nong-y Sẽn-Ka-Saabo. Sẽn-Ka-Saab gũuda neb nins sẽn tẽed bãmbã. La b sɩbgda wuk-m-mens rãmbã hal wʋsgo.

²⁵ Yãmb dãmb fãa sẽn maand tẽeb ne Sẽn-Ka-Saabã, paam-y raoodo, la y keng y mense!