Yɩɩn‑sõamyã 30 - WẼNNAAM SEBRE 2014

Ned sẽn põs kũum n pʋʋsd barka

¹ A Davɩɩd yɩɩlle, roogã bark ningr yĩnga.

² Sẽn-Ka-Saabo, mam waoogda yãmba. Bala, yãmb zẽka maam n yiis bokẽ. Yãmb ka bas tɩ mam bɛɛbã paam sũ-noog mam wɛɛngẽ ye.

³ Sẽn-Ka-Saab sẽn yaa mam Wẽnnaam, mam boola yãmb n kos sõngre, la yãmb maaga maam.

⁴ Sẽn-Ka-Saabo, yãmb yiisa maam kɩɩm-kulg pʋga, yãmb leb n kõo maam vɩɩm, n kɩt tɩ m zãag ne sẽn sigd-b yaoogẽ wã.

⁵ Sẽn-Ka-Saab nin-nongdse, yɩɩl-y bãmb yĩnga, n pʋʋs-b barka, bãmb yʋ-sõngã tẽegr yĩnga!

⁶ Bala, bãmb sũ-yikrã kaoosda wakat bilf bala, la bãmb sõmblmã paada vɩɩmã tɛka. Zaabr tõe n yaa yãbre, tɩ yibeoog yaa sũ-noog kaasgo.

⁷ Mam vɩ-bãanã wakate, mam yeelame: «Bũmb kõn tol n tõog n miim maam ye.»

⁸ Sẽn-Ka-Saabo, yãmb sõmblmã pʋga, y rag n kɩtame tɩ mam tãngã paam pãnga, la yãmb sẽn solg y nengã ne maamã, rabeem-kãseng yõka maam.

⁹ Sẽn-Ka-Saabo, mam boonda yãmba, Zu-soaba, mam wẽed-y-la kãntɩɩga.

¹⁰ Mam zɩɩm daagr nafda yãmb ne bõe? Mam yaoogẽ sigb yõod ne yãmb yaa bõe? Tẽng tom tõe n leb n pʋʋsa yãmb bark sɩda? Tẽng tom tõe n leb n kɩsa yãmb sɩdã kaseto?

¹¹ Sẽn-Ka-Saabo, kelg-y-ma, la y zoe m nimbãanega! Sẽn-Ka-Saabo, sõng-y-ma!

¹² Yãmb teka mam wiisgã tɩ lebg kɩdengo, yãmb yeega mam sũ-sãang fuugã, n yeelg-m tigr fuugu,

¹³ tɩ m na n yɩɩl ne m sũur fãa, n waoog yãmb n ka sĩnd ye. Sẽn-Ka-Saab sẽn yaa mam Wẽnnaam, mam na n pẽga yãmb wakat fãa.