Yɩɩn‑sõamyã 28 - WẼNNAAM SEBRE 2014

Ned sẽn boond n kot sõngre

1 A Davɩɩd yɩɩlle.

¹ A Davɩɩd yɩɩlle. Sẽn-Ka-Saabo, mam kelemd n boonda yãmba. Yãmb yaa mam pĩiga! Bɩ y leok maam, la y ra sĩnd y noor ye. Bala, yãmb sã n sĩnd n ka leok maam, mam na n yɩɩ wa neb nins sẽn ki tɩ b mum-bã.

² Mam sã n wa n zẽk m nusã n tees yãmb zĩig sẽn welg toor n yɩɩd fãa wã n pʋʋse, bɩ y wʋm m kosgã, wʋm-y mam sẽn boond yãmb n kot sõngrã.

³ Ra naag-y maam ne nin-wẽnsã ye. Ra naag-y maam ne tʋʋm-beed maandbã n sãam ye. Bãmb noyã baooda zems-n-taar ne neb a taabã, tɩ bãmb sũyã yaool n pid ne wẽnga.

⁴ Bɩ y keo bãmb wa sẽn zems b tʋʋmã, la wa sẽn zems b tʋʋm-wensã. Yao-y bãmb wa sẽn zems b nusã tʋʋmã. Kɩt-y tɩ b sẽn maan neb a taabã leb-ba!

⁵ Bala, bãmb ka tagsd Sẽn-Ka-Saab tʋʋmã ne b nus tʋʋmã yell ye. Bɩ Sẽn-Ka-Saab lub-ba, n kɩt tɩ b ra tol n leb n yik ye!

⁶ Bɩ Sẽn-Ka-Saab paam pẽgre! Bãmb wʋmda mam se-yõkrã.

⁷ Sẽn-Ka-Saab yaa mam pãnga, la m gãongo. Mam sũur keema ne bãmba, la bãmb sõngda maam. Mam maanda sũ-noog n yɩɩnd n pẽgd bãmba.

⁸ Sẽn-Ka-Saab yaa b nebã pãnga. Bãmb yaa pãng zĩig b nin-tũusdgã fãagr yĩnga.

⁹ Fãag-y y nebã. Bɩ y ning neb nins sẽn yaa yãmb dẽndã barka! Bɩ y yɩ bãmb pe-kɩɩma, la y tebl bãmb wakat sẽn ka sɛta.