Yɩɩn‑sõamyã 27 - WẼNNAAM SEBRE 2014

Sẽn-Ka-Saab yaa mam vẽenem

1 A Davɩɩd yɩɩlle.

¹ A Davɩɩd yɩɩlle. Sẽn-Ka-Saab yaa mam vẽenem, la mam fãagda. Ãnda la mam na n zoe? Sẽn-Ka-Saab yaa mam vɩɩmã gũuda, ãndã n tõe n kẽes maam dabeem?

² Tʋʋm-wẽns maandbã sẽn yaa mam zabd-n-taas la m bɛɛbã sã n kolgd n dat n sãam maam, yaa bãmb n na n lak n lʋɩ.

³ Tãb-biis sã n tilg b tãb-sik n dat n zab ne maam, mam kõn tol n zoe rabeem ye. La b sã n yik zabr ne maam, baoosgo, mam sũur ket n keemame.

⁴ Bũmb a yembr bal la mam kot Sẽn-Ka-Saabo, n baood-a ne m sũur fãa. Yaa tɩ m tõog n zĩnd Sẽn-Ka-Saab roogẽ wã m vɩɩmã tɛka, n tõog n ges Sẽn-Ka-Saab neerlmã, la m tags bãmb roogã yelle.

⁵ Bala, yel-pakr wakate, bãmb na n gũu maam b roogã pʋga. Bãmb na n solga maam b fu-roogẽ wã. Bãmb na n zẽka maam n dʋʋs pĩig zugu.

⁶ Dẽ, mam paama zu-zẽkr n yɩɩd m bɛɛbã. Mam na n maana maoong n kaas ne sũ-noog Sẽn-Ka-Saab roogã pʋga. Mam na n yɩɩlame, la m wẽ yʋʋm-teed Sẽn-Ka-Saab yĩnga.

⁷ Sẽn-Ka-Saabo, kelg-y mam sẽn boond yãmbã, la y zoe m nimbãaneg n leok-ma.

⁸ Mam sũur gomda ne maam yãmb wɛɛngẽ n yetẽ: «Bao Sẽn-Ka-Saab nenga!» Sẽn-Ka-Saabo, yaa yãmb neng la m baooda!

⁹ Bɩ y ra solg-y y nengã ne maam ye, la y ra leng-m y sũ-yikrã pʋg ye! Bala mam yaa yãmb tʋmtʋmda! Bala, yaa yãmb n sõngd maam. Ra-y zãag-y ne maam, la ra bas-y-m ye. Yãmb la Wẽnnaam sẽn fãagd maam.

¹⁰ Baa mam ba wã ne m ma wã sã n bas maam, yãmb a Sẽn-Ka-Saab na n deega maam.

¹¹ Sẽn-Ka-Saabo, zãms-y maam tɩ m dɩk yãmb sorã, tɛ-y maam tɩ m tũ y tɩrlem sorã, sẽn namsd-b maamã yĩnga.

¹² Da bas-y tɩ m bɛɛbã maan b sẽn dat ne maam ye. Bala, zĩrẽ kaset rãmb n yik n dõt maam, n baood maam ne wẽnga.

¹³ Mam sũur keemame tɩ m na n yãnda Sẽn-Ka-Saab sõmblmã dũniyã zug ka nin-vɩɩsã sʋka.

¹⁴ Maan tẽeb ne Sẽn-Ka-Saabo! Paam daoodo, la f keng f menga! Maan tẽeb ne Sẽn-Ka-Saabo!