Yɩɩn‑sõamyã 22 - WẼNNAAM SEBRE 2014

Ned sẽn pẽgd Sẽn-Ka-Saab a sũ-sãang pʋga

¹ A Davɩɩd yɩɩlle, yɩɩlã naab yĩnga. Yɩɩnda wa yɩɩll sẽn boond tɩ «zĩ-yẽegr walga.»

² Mam Wẽnnaam! Mam Wẽnnaam! Yaa bõe tɩ yãmb bas maam? Bõe yĩng tɩ y zãag y meng ne maam? Bõe yĩng tɩ y ka wat n fãag-ma? Bõe yĩng tɩ y ka wʋmd m kɛlengã?

³ Mam Wẽnnaam, wĩndga mam kelemd n boonda yãmba, la y ka leokd-m ye. Yʋng me, mam ka sĩnd m noor ye.

⁴ Yãmb yaool n yaa pʋ-peelem soaba, yãmb dɩta naam Israyɛll nebã pẽgr pʋga!

⁵ Tõnd yaab-rãmbã rag n dɩka b teegrã n teeg yãmba, bãmb teega yãmba, la y fãag-b lame.

⁶ Bãmb kelem n boola yãmba, la yãmb sõngd-b lame. Bãmb dɩka b teegrã n teeg yãmba, la b ka paam yãnd ye.

⁷ La maam, mam ka leb n yaa wa ninsaal ye. Mam wẽnda wa bɛdeng bala, tɩ nebã paoogd maam, la b yaand maam.

⁸ Sẽn yãnd-a maam fãa yaanda maam. Bãmb laada maam la b gõmsd b zut n yetẽ:

⁹ «Beneere, a ka yeel t'a basa a yellã ne Sẽn-Ka-Saab la! Bɩ Sẽn-Ka-Saab sõng-a t'a põse! Sẽn-Ka-Saab sã n nong-a lame bɩ b fãag-a!»

¹⁰ Sẽn-Ka-Saabo, yãmb n yiis maam m ma pʋgẽ, yãmb n kɩt tɩ mam yẽsem m ma bĩisim ne yam-gãnega.

¹¹ Mam dogem tɛka, b rɩka maam n gũnug yãmba. La baa mam sẽn dag n ket m ma pʋgẽ, yãmb n yaa mam Wẽnnaam.

¹² Da-y zãag-y meng ne maam ye. Bala, yel-pakr pẽnegda maam, la ned ka be n na n sõng-m ye.

¹³ Bɛɛbã yaa wʋsg wa lols n gũbg maam, Basã we-rũmsã gũbga maam.

¹⁴ Bãmb yaaga b noy n tees maam, wa gɩgemd sẽn kelemd n dat n zers bũmbu.

¹⁵ Mam pãngã loogda wa koom sẽn daagde, tɩ mam kõabã fãa sũgsi. Mam sũurã wẽnda wa sɩ-ribdu, a yẽnegda m pʋgẽ.

¹⁶ Mam pãngã sɛɛ wa sar sẽn wã, Mam zelemdã tabendeda m dagsendakã. Yãmb gãnega maam kũum tomẽ.

¹⁷ Bala, baas wʋsg gũbga maam. Nin-wẽns sull gũbga maam, bãmb sẽba mam nusã ne m naoã.

¹⁸ Mam faaga wʋsgo, hal tɩ b tõe n sõd m kõabã fãa yembr-yembre. B geta maam, mam lebga b bõn-gɛtla.

¹⁹ Bãmb dɩka mam fut n pʋɩ taaba, bãmb maana poeer ne mam fu-yorgã.

²⁰ Sẽn-Ka-Saabo, ra-y zãag y meng ne-m ye! Yãmb la mam pãnga, wa-y tao-tao n wa sõng-ma!

²¹ Bɩ y fãag maam ne zabr sʋʋga, fãag-y maam tɩ baasã ra paam-m ye!

²² Fãag-y maam gɩgemdã noorẽ, la y fãag maam ne we-niigã yɩɩla. Sẽn-Ka-Saabo, yãmb leoka maam.

²³ Mam na n moona yãmb yʋʋrã m ba-biisã sʋka. Mam na n pẽga yãmb nebã tiging sʋka.

²⁴ Yãmb dãmb sẽn zoet Sẽn-Ka-Saabo, pẽg-y bãmba! Yãmb fãa sẽn yaa a Zakoob yagense, waoog-y bãmba! Yãmb fãa sẽn yaa a Israyɛll yagense, rig-y bãmb taoore.

²⁵ Bala, Sẽn-Ka-Saab ka paoogd nimbãan-ned namsg ye. Bãmb ka kisgd-a n wẽnemd b neng n bas-a ye. Nimbãan-nedã sã n kelem n bool n kos sõngre, bãmb kelgd-a lame.

²⁶ Yãmb la m na n pẽg kʋʋngã sʋka. Mam na n pidsa m pʋlengã sẽn zoet-b yãmbã nifẽ.

²⁷ Naong rãmbã na n dɩɩ n tɩgame. Sẽn baood-b Sẽn-Ka-Saabã na n pẽga bãmba. Bɩ bãmb vɩɩmd wakat sẽn ka sɛta!

²⁸ Dũniyã gill fãa nebã na n tẽega Sẽn-Ka-Saab yelle, la b na n wẽnemd n baoo bãmba. Buud nins fãa sẽn be dũniyã zugã na n wõgemd n waooga bãmba.

²⁹ Bala, yaa Sẽn-Ka-Saab n dɩt naam. Bãmb yaa bu-zẽmsã fãa soaala!

³⁰ Dũniyã pãens rãmbã fãa na n dɩɩme, la b wõgemd bãmb taoore. Ninsaalbã sẽn na n lebg tẽng tomã fãa, ne neb nins sẽn dat n ki-bã na n yĩgimda bãmb taoore.

³¹ Bãmb yagensã na n tũu Zu-soabã. Bãmb na n togsa Zu-soabã kibar zamaan ning sẽn watã sʋka.

³² B na n togsa sẽn na n dog-bã Sẽn-Ka-Saab sẽn maan bũmb nins bãmb tɩrlmã pʋgẽ wã.