Yɩɩn‑sõamyã 21 - WẼNNAAM SEBRE 2014

Wẽnnaam pẽgr yɩɩlle

¹ A Davɩɩd yɩɩlle, yɩɩlã naab yĩnga.

² Sẽn-Ka-Saabo, rĩmã maanda sũ-noogo, yãmb pãngã yĩnga. A kɩdemda ne sũ-noogo, yãmb fãagrã yĩnga.

³ Yãmb kõo yẽnda a sũurã sẽn dag n datã. A sã n yaag a noor n kosã yãmb bũmbu, yãmb ka zãgsd ye.

⁴ Bala, yãmb segda yẽnda ne bark bõn-sõamyã, yãmb fõgna yẽnda ne maanf sẽn maan ne sãnem halaale.

⁵ Rĩmã rag n kosa yãmb vɩɩm, la y kõ-a lame. Yãmb kõ-a-la yõ-wok wakat sẽn ka sɛt yĩnga.

⁶ A ziirã yaa kãsenga, yãmb sẽn fãag-a wã yĩnga. Yãmb kõ-a-la ra-sãnde, la y waoog-a.

⁷ Yãmb kɩtame t'a tar bark wakat fãa. A sẽn be yãmb taoorã kõt-a-la sũ-noogo.

⁸ Rĩmã teega Sẽn-Ka-Saabo, la Sẽn-Ka-To nonglmã yĩnga, a ka vigsd ye.

⁹ Yãmb nugã na n paama y bɛɛbã fãa, yãmb nug-rɩtgã na n gãda sẽn kis-b yãmbã.

¹⁰ Daar ning yãmb sẽn na n puk y mengã, yãmb na n kɩtame tɩ b yɩ wa wʋng bugum sẽn wɩnge. Sẽn-Ka-Saab sũ-puugrã pʋgẽ, b na n sãama bãmba, la bugum n na n dɩ bãmba.

¹¹ Yãmb na n menesa bãmb kambã dũniyã zugu, y na n menesa b yagensã ninsaalbã sʋka.

¹² Bãmb bao n na n maana yãmb wẽnga, b set n dat n zaba ne yãmba, la b ka na n tol n tõog ye.

¹³ Bala, yãmb na n dig-b lame tɩ b zoe, la y na n yãaga y tãp n tão-ba.

¹⁴ Sẽn-Ka-Saabo, yik-y-yã! Yik-y n wilg-y y pãngã! Tõnd na n yɩɩla yãmb pãngã, ne yɩɩn-noodo.