Yɩɩn‑sõamyã 19 - WẼNNAAM SEBRE 2014

Wẽnnaam tʋʋmã ne b tõodã

¹ A Davɩɩd yɩɩlle, yɩɩlã naab yĩnga.

² Saasẽ moonda Wẽnnaam ziirã, la sa-gãongã togsda bãmb nus tʋʋmã.

³ Daar kɩta bãmb tʋʋmã kaset ne daar a to, la yʋng wilgda bãmb tʋʋmã yʋng a to.

⁴ Ka ne noor goamã ye, leb n ka ne gom-biis me ye. Ned ka wʋmd bãmb koɛɛg rãamd ye.

⁵ Bãmb koɛɛgã pukda dũniyã gill pʋga, bãmb koɛɛgã rãamd saagda dũniyã tɛk fãa. Wẽnnaam tilga fu-roog beenẽ n kõ wĩntoogã.

⁶ Yibeoogo, wĩndgã pukda wa yikãad-paall sẽn yit a roogẽ, n kɩdemd wa gãndaoog sẽn be sor zug n zoetẽ.

⁷ Wĩndgã pukda sa-gãongã kɩreng a yembre, n gilg n tɩ kẽ kɩreng a to, la a walmã wẽeda bũmbã fãa.

⁸ Sẽn-Ka-Saab tõogã zemsa zãnga, la a leb n manegda vɩɩm. Sẽn-Ka-Saab kasetã yaa sɩd zãnga, n kõt ka-yam soabã yam.

⁹ Sẽn-Ka-Saab no-tũudsã yaa tɩrse, la b kõta sũ-noogo, Sẽn-Ka-Saab noyã yaa vẽenem, la a kɩtdame tɩ nin yãt vẽenega.

¹⁰ Sẽn-Ka-Saab zoees yaa bõn-sõngo, la a paada wakat sẽn kõn sɛ. Sẽn-Ka-Saab no-tũudsã yaa sɩda, la b fãa yaa tɩrse.

¹¹ Bãmb tara yõod n yɩɩd sãnem halaale, b noom yɩɩda sɩɩdo, b yɩɩda sɩ-kaam sẽn yit sɩ-vãkẽ n tosdẽ.

¹² Yãmb no-tũudsã keoogda mam sẽn yaa yãmb tʋmtʋmdã. Ned ning sẽn sakd bãmb paamda yõod wʋsgo.

¹³ Ãnda soab n tõe n bãng a tudgri? Kõ-y maam sugr m yel-wẽn nins m sẽn maan n ka bãngã yĩnga.

¹⁴ Gũ-y maam me ne wuk-m-mens rãmbã. Ra bas-y tɩ b soog maam ye! Woto, mam na n yɩɩ burkĩna tɩ beeg-kãseng ka be m zug ye.

¹⁵ Bɩ mam noorã goamã, la m sũurã tagsg ta yãmb yam. Sẽn-Ka-Saabo, yãmb yaa mam pĩiga, la m fãagda!