Yɩɩn‑sõamyã 18 - WẼNNAAM SEBRE 2014

Ned sẽn yɩɩnd n pẽgd Sẽn-Ka-Saabo

¹ Yɩɩlã naab yĩnga. Yaa Sẽn-Ka-Saab tʋmtʋmd a Davɩɩd yɩɩlle. A Davɩɩd yɩɩndame n pẽgd Sẽn-Ka-Saabo, daar ning Sẽn-Ka-Saab sẽn fãag yẽnda ne a bɛɛbã fãa wã, la b fãag-a a Sayull nugẽ wã.

² A Davɩɩd yeelame: «Sẽn-Ka-Saab sẽn yaa mam pãnga, mam nonga yãmba!

³ Sẽn-Ka-Saab yaa mam pĩiga, mam pãng zĩiga, la m fãagda! Mam Wẽnnaamã yaa mam pĩig sẽn yaa mam zĩ-soalgdga. Bãmb yaa mam gãongo, la pãng sẽn fãagd maam, ne m pãng zĩiga!»

⁴ Mam sã n zẽk m koɛɛg n yeel tɩ: «Bɩ Sẽn-Ka-Saab yʋʋr paam pẽgre,» bãmb fãagda maam m bɛɛbã fãa nusẽ!

⁵ Kũum sẽbds rag n sẽba maam, la sãoong ko-zoetem kẽes-m-la rabeem.

⁶ Kɩɩm-kulg wĩy rag n vila maam, kũum gãmbr dag n bee mam taoore.

⁷ Mam yel-pakrã pʋga, mam boola Sẽn-Ka-Saabo, mam boola m Wẽnnaamã tɩ b wa sõng-ma, b zĩnda b ro-sõngẽ wã n wʋm m boolgã, la mam sẽn boond bãmb n kot sõngrã lʋɩɩ bãmb tʋbrẽ.

⁸ Tẽn-gãongã rigimdame n miime, tãmsã yẽbgr rĩmsame, Bala, Sẽn-Ka-Saab sũurã puugame.

⁹ Bug-zõos rag n yita bãmb yõyẽ wã n zẽkdẽ, bug-witim n dag n yit bãmb noorẽ, bug-saal me n dag n yit be.

¹⁰ Sẽn-Ka-Saab zõnega sa-gãongã n tab n sigi, bãmb yasa sawad-taok zugu.

¹¹ Bãmb dag n zaoo Serubẽ n yɩgda, bãmb zomba sobg pɩgs n laandẽ.

¹² Bãmb solga b meng lik pʋgẽ, n kɩt t'a lebg roog n gũbg bãmb wa koom sẽn be sawad-lik pʋga.

¹³ Vẽen-kãseng n dag n yit sawatẽ wã n be bãmb taoore, la sa-pɩlem ne bug-saal n dag n yit beenẽ.

¹⁴ Sẽn-Ka-Saab zĩnda saasẽ n tãse, Sẽn-Ka-To kɩtame tɩ b wʋm b koɛɛgã rãamde, la bug-saal ne sa-pɩlem zĩndame.

¹⁵ Sẽn-Ka-Saab tão b pɛɛmã n sãeeg bɛɛbã. Sẽn-Ka-Saab kɩtame tɩ sa-yãgb wʋsg zĩnd n kẽes bɛɛbã rabeem.

¹⁶ Sẽn-Ka-Saabo, yãmb sẽn tãs-bã, y noorã pemsem ne y vʋʋsmã pemsem sẽn yi yãmb yõ-bogdẽ wã kɩtame tɩ koomã tẽngr tẽn-gãongã puki, tɩ dũniyã yẽbgr zɛɛmd n puki.

¹⁷ Sẽn-Ka-Saab zĩnda yĩngr n tẽeg b nug n gãd maam n yiis ko-kãsemsã pʋga.

¹⁸ Bãmb fãaga maam m bɛyã sẽn tar pãngã nugẽ. B fãag-m-la sẽn kis-b maam n tar pãng n yɩɩd maamã nugẽ.

¹⁹ Nin-bãmbã bẽda toogã sẽn paam maamã daare, n na n zab ne maam, la Sẽn-Ka-Saab wa n sõnga maam.

²⁰ Sẽn-Ka-Saab yolsa maam n kɩt tɩ m kẽnd ne lohorem. Bãmb fãaga maam, b sẽn nong maamã yĩnga.

²¹ Sẽn-Ka-Saab maana maam wa sẽn zems m tɩrlem. Bãmb keoo maam, mam sẽn ka maan yellã yĩnga.

²² Bala, mam saka Sẽn-Ka-Saab raabã, n ka zãag m meng ne m Wẽnnaamã wa nin-wẽnsã sẽn maandã ye.

²³ Mam tagsda Sẽn-Ka-Saab tõodã fãa yelle, la mam ka zãagd m meng ne bãmb noyã ye.

²⁴ Mam maana burkĩnd ne Sẽn-Ka-Saabo, n gũus m meng n da wa kong ne bãmb ye.

²⁵ Dẽ, Sẽn-Ka-Saab keoo maam wa sẽn zems m tɩrlem, Bãmb keoo maam, b sẽn ges tɩ mam ka maan yell bãmb nifẽ wã yĩnga.

²⁶ Sẽn maan-a pʋ-peelem ne yãmba, yãmb maanda pʋ-peelem ne a soaba. Sẽn maan-a burkĩnd ne yãmba, yãmb wilgda a soab y burkĩndi.

²⁷ Ned sã n maand pʋ-peelem ne yãmba, yãmb wilgda a soab tɩ y yaa pʋ-peelem soaba. La ned ning sẽn tagsd t'a tara sɩlem, yãmb wilgda a soab tɩ yãmb sɩlem n yɩɩde.

²⁸ Bala, yãmb n fãagd nimbãan-nebã, la y sikd zẽk-m-mens rãmbã.

²⁹ Yãmb a Sẽn-Ka-Saab n widgd mam fɩtla. Sẽn-Ka-Saab sẽn yaa mam Wẽnnaamã n yaa mam vẽenem lik bida pʋgẽ.

³⁰ Ne yãmb pãnga, mam zoet n segda tãb-bi-sulli, ne mam Wẽnnaamã pãnga, mam gãndgda lalga.

³¹ Wẽnnaam soayã zemsa zãnga, Sẽn-Ka-Saab goamã yaa sɩda, la b yaa gãongo, neb nins fãa sẽn soonded bãmb nengẽ wã yĩnga.

³² Sã n ka Sẽn-Ka-Saabo, Wẽnnaam a to bee yɛɛnẽ? La ãndã n yaa pĩig kugri, tɩ sã n ka tõnd Wẽnnaamã?

³³ Wẽnnaam-kãng n kõt maam pãnga, n kɩtdẽ tɩ mam manesmã zemsd zãnga.

³⁴ Bãmb n kɩtd tɩ mam naoã yaa faasg wa walg nao, n sõngd maam tɩ m dʋʋd zĩ-zãongls zutu.

³⁵ Bãmb n zãmsd maam zabr sẽn zabd to-to, la b sõngd maam tɩ m yãagd zũud tãpo.

³⁶ Sẽn-Ka-Saabo, yãmb kõta maam y fãagrã tɩ yaa m gãongo, yãmb nug-rɩtg tebendeda maam, yãmb sẽn leokd maamã bɩɩsda maam.

³⁷ Yãmb yalgda mam sor tɩ m kẽnda. Mam nao-sẽbã yaa kãenkãe tɩ m kẽnd lebg faasga.

³⁸ Mam digda m bɛɛbã n tɩ paam-ba, la mam ka lebgd tɩ m ka sãam-b zãng ye.

³⁹ Mam pãbda m bɛɛbã n pogendẽ, tɩ b ka leb n tõe n yik ye. Bãmb kiid n dʋʋgdame tɩ mam tabd n loogdẽ.

⁴⁰ Yãmb kõta maam pãng tɩ m tõe n zabe, yãmb kɩtdame tɩ mam tõog m bɛɛbã.

⁴¹ Yãmb kɩtdame tɩ mam bɛɛbã zoet mam taoore, la m na n menesa sẽn kis-b maamã zãnga.

⁴² Bãmb kelemd n kota sõngre, la ned ka be n na n fãag-b ye! Bãmb kelemd n boonda Sẽn-Ka-Saabo, la b ka leokd-b ye.

⁴³ Mam neema bãmb wa tom sobg sẽn dɩkda, mam kãagd-b-la wa sor zug begdo.

⁴⁴ Yãmb kɩtdame tɩ m põs nebã zabã, la y lʋɩɩsd-m bu-zẽms taoore, n kɩtdẽ tɩ m soogd buud m sẽn dag n ka mi.

⁴⁵ Mam sã n gom bala, b sakdame, bu-zẽmsã belemda maam.

⁴⁶ Bu-zẽmsã pãng sɛɛme, b yita b zĩ-solgdsẽ wã, n digda.

⁴⁷ Sẽn-Ka-Saab vɩɩme! Bɩ mam pĩigã paam pẽgre! Bɩ Wẽnnaam sẽn yaa mam fãagdã paam waoogre!

⁴⁸ Wẽnnaam-kãng n dokd m sũur n kõt-ma, n kɩtdẽ tɩ m soogd bu-zẽmse.

⁴⁹ Bãmb n sõngd maam tɩ m põsd m bɛɛbã! Yãmb zẽkda maam tɩ m yɩɩg m zabd-n-taasã, yãmb fãagda maam nin-toaag nugẽ.

⁵⁰ Rẽ n kɩt yaa Sẽn-Ka-Saabo, tɩ mam na n pẽg yãmb bu-zẽmsã sʋka, la m yɩɩl n pẽg yãmb yʋʋrã.

⁵¹ Sẽn-Ka-Saab maanda tʋʋm-kãsems n fãagd b rĩmã, bãmb wilgda b nonglem ne b nin-tũusdgã. Bãmb wilga b nonglem ne a Davɩɩde, la ne a Davɩɩd yagensã, wakat sẽn kõn sa yĩnga.