Yɩɩn‑sõamyã 17 - WẼNNAAM SEBRE 2014

Ned sẽn kot fãagre

1 A Davɩɩd pʋʋsgo.

¹ A Davɩɩd pʋʋsgo. Sẽn-Ka-Saabo, kelg-y m sẽn kot yãmb ne tɩrlmã, wʋm-y m kɛlengã. Kɩll-y y tʋbr n kelg m pʋʋsgã, tɩ m ka pʋʋsd-y ne zãmb ye.

² Yãmb n na n kao mam bʋʋdo. Yãmb nin nee tɩrlem sẽn beẽ!

³ Yãmb feesa mam sũurã, la yʋngo, yãmb gũusa maam. Yãmb maka maam n gese, la y ka yãnd bũmb sẽn yaa wẽng ye. Mam yõka m meng n ka bas tɩ m sẽn tagsã yi m noorẽ ye.

⁴ Mam sẽn yãnd nebã tʋʋmã, mam sak n tũu yãmb noorã goamã, mam gũusda m meng n ka rat n tũ nin-wẽnsã sor ye.

⁵ Mam tũu yãmb naoore, la m naoor ka tol n lak ye.

⁶ Mam Wẽnnaam, mam boonda yãmba, bala, yãmb n leokd maam! Kɩll-y y tʋbr n kelg m goamã.

⁷ Wilg-y tɩ y yaa nonglem soaba. Neb sã n wa soond yãmb nengẽ, yãmb nug-rɩtg fãagd-b-la b namsdbã nusẽ.

⁸ Kogl-y maam wa ned sẽn kogend a nin-beelle. Solg-y maam y pɩgsã tẽngre.

⁹ Sõng-y maam tɩ m tõog n põs nin-wẽnsã sẽn namsd maamã, fãag-y maam ne m bɛɛbã sẽn gũbg maam n dat n sãam maamã!

¹⁰ Bãmb kenga b sũyã n ka zoet ned nimbãaneg ye. Bãmb gomda wuk-m-men-goamã.

¹¹ Bãmb pʋgda tõnd nao, b zoe n gũbga tõndo. Bãmb gũusdame n baood n gãneg tõnd tẽnga.

¹² Bãmb wẽnda wa gɩgemd sẽn dat n zendem a sẽn yõke. Bãmb wẽnda wa gɩgem-poll sẽn sor n dat n biri!

¹³ Sẽn-Ka-Saabo, yik-y-yã! Yik-y n seg-y-b n gãneg-b tẽnga. Rɩk-y y zabr sʋʋgã n fãag-m nin-wẽnsã nugẽ.

¹⁴ Sẽn-Ka-Saabo, zẽk-y y nug n sõng-m tɩ m põs dũni-kãngã nebã! Bãmb pʋɩɩr yaa tɩ b yiis-b nin-vɩɩsã sʋka, la y yũnug-b toog ning yãmb sẽn bĩng b yĩngã. Kɩt-y tɩ sɩbg-kãng sek b kambã, n kell n bĩng b yagense!

¹⁵ Sã n yaa ne maam, yaa tɩrlem pʋg la mam na n yãnd yãmb nenga! Mam sã n gũs n neke, yãmb belmã sekda maam!