Yɩɩn‑sõamyã 149 - WẼNNAAM SEBRE 2014

Sẽn-Ka-Saab nonga b nebã

¹ Pẽg-y Sẽn-Ka-Saabo! Yɩɩl-y yɩɩn-paalg Sẽn-Ka-Saab yĩnga! Yɩɩl-y n pẽg-y Sẽn-Ka-Saab bãmb nin-nongdsã nebã sʋka!

² Bɩ Israyɛll nebã maan sũ-noog b naandã yĩnga! Bɩ Sɩyõ kom-dibli wã kɩdem b rĩmã yĩnga!

³ Bɩ b sao n pẽg bãmb yʋʋrã. Bɩ b wẽ gãngãoogo, la b wẽ pɛndg n pẽg bãmba!

⁴ Bala, Sẽn-Ka-Saab sũur nooma ne b nebã. Bãmb fãaga naong rãmbã, n waoog-ba.

⁵ Bɩ Wẽnnaam nin-nongdsã kɩdem n waoog-ba. Baa b sã n wa be b gãasẽ, bɩ b kaas ne sũ-noogo!

⁶ Bãmb noyã pida ne Wẽnnaam pẽgre, tɩ zabr sʋʋg sẽn tar noy a yiib be bãmb nugẽ.

⁷ Bãmb dat n doka b sũur ne bu-zẽmsã, la b sɩbg buud toay-toayã,

⁸ n sẽb b rĩm-dãmbã ne bãense, la b balg b nin-kãsemsã ne kutu,

⁹ n kɩt tɩ b reeg sɩbgr ning sẽn dag n gʋls b yĩngã! Bõn-kãng na n yɩɩ Wẽnnaam nin-nongdsã fãa zu-zẽkre. Pẽg-y Sẽn-Ka-Saabo!