Yɩɩn‑sõamyã 144 - WẼNNAAM SEBRE 2014

Rĩm sẽn pʋʋsd n kot sõngre

1 Yaa a Davɩɩd yɩɩlle.

¹ Yaa a Davɩɩd yɩɩlle. Bɩ Sẽn-Ka-Saab sẽn yaa mam pĩigã paam pẽgre. Bãmb n zãmsd maam zabr sẽn zabd to-to, la b segend mam nus zabr yĩnga.

² Sẽn-Ka-Saab yaa mam maan-neer soaba. Bãmb yaa mam pãng zĩiga, la m zĩ-soalgdga, la m fãagda. Bãmb yaa mam gãongo, la m zĩ-lilldga. Bãmb n kɩtd tɩ nebã sakd maam!

³ Sẽn-Ka-Saabo, ninsaal yaa bõe tɩ yãmb nand-a? Ninsaal yaa ãnda tɩ yãmb get a yelle?

⁴ Ninsaal wẽnda rʋk waolg bala, la a yʋʋmã wẽnda maasem sẽn loogda.

⁵ Sẽn-Ka-Saabo, kɩll-y saasã n sigi! Sɩɩs-y tãmsã tɩ bug-zõos yi b pʋsẽ!

⁶ Bɩ y tʋm sa-tãs n sãeeg-ba! Tão-y y pɛɛmã n zũndg-ba!

⁷ Zĩnd-y yĩngr n tẽeg y nugã, n fãag-ma, fãag-y-m ko-kãsemsã pʋga, fãag-y maam bu-zẽmsã nugẽ.

⁸ Bala, b noyã yagda zĩrẽ, la b nug-rɩtg pida ne zãmbo.

⁹ Mam Wẽnnaam, mam na n yɩɩla yɩɩn-paalg yãmb yĩnga. Mam na n wãaga ruudg sẽn tar sus piig yãmb yĩnga.

¹⁰ Yãmb a Wẽnnaam n kõt rĩm-dãmb tõogre. Yãmb n sõngd y tʋmtʋmd a Davɩɩd t'a põs sãoong zabr sʋʋga.

¹¹ Yols-y maam, la y fãag-m bu-zẽmsã nugẽ, bala, b noyã yagda zĩrẽ, la b nug-rɩtg pida ne zãmbo.

¹² Tõnd kom-dibli wã wẽnda tɩ-poal sẽn yi n bɩtẽ. Tõnd kom-pugli wã neermã wẽnda tãn-met sẽn nags na-yir ra-lugd-bɩlma.

¹³ Tõnd bao wã pida ne bõn-koaadl buud fãa. Tõnd rũm-bãoonegã fɩɩgd n lebgda tusa, b fɩɩgd n lebgda tus piig-piig tõnd wetã pʋse.

¹⁴ Tõnd niigã tara pʋse. Rũm-kũum wall rũng sẽn fabd ka be be ye. Sũ-sãang kɛleng ka be tõnd sõasg zĩigẽ ye!

¹⁵ Bark bee neb nins sẽn paam bõn-kãensã zutu! Bark bee neb nins sẽn paam tɩ Sẽn-Ka-Saab yaa b Wẽnnaamã zutu!