Yɩɩn‑sõamyã 143 - WẼNNAAM SEBRE 2014

Ned sẽn kot fãagre

1 A Davɩɩd yɩɩlle.

¹ A Davɩɩd yɩɩlle. Sẽn-Ka-Saabo, wʋm-y mam pʋʋsgã, la y kɩll y tʋbr n kelg m se-yõkrã! Bɩ y leok maam y pʋ-peelmã ne y tɩrlmã pʋga.

² Bɩ y ra bʋ ne y tʋmtʋmdã ye. Bala, nin-vɩɩsã sʋka, ned ba a yembr ka be n yaa tɩrg yãmb nifẽ ye.

³ Bɛyã pʋgd n tabda maam, n namsd mam vɩɩmã. Yẽnda kẽesa maam lik bida pʋga, wa neb nins sẽn ki daar zãrã.

⁴ Mam daoodã sɛɛ zãnga. Mam gĩinã maaga zãnga.

⁵ Mam tẽra kʋdem-wẽndẽ yelle, mam leb n gomda yãmb tʋʋmã yelle, mam tagsda yãmb nus tʋʋmã yelle.

⁶ Mam zẽkda m nus n teesd yãmba. Mam baooda yãmb wa tẽn-koɛɛng sẽn dat koom.

⁷ Sẽn-Ka-Saabo, leok-y maam tao-tao, mam sɩɩgã yɛɛme. Da solg-y y nengã ne maam ye. Sã n ka rẽ, mam na n lebga wa neb nins sẽn sigd yaoogẽ wã.

⁸ Kɩt-y tɩ m wʋm yãmb nonglem koɛɛgã yibeoog fãa! Bala, mam dɩka m teegrã n teeg yãmba. Kɩt-y tɩ m bãng sor ning m sẽn tog n dɩke. Bala, mam geta yãmba.

⁹ Sẽn-Ka-Saabo, fãag-y maam m bɛɛbã nugẽ! Mam soondeda yãmb nengẽ.

¹⁰ Zãms-y maam tɩ m maan yãmb daabo. Bala, yaa yãmb la mam Wẽnnaam. Bɩ yãmb maan-neer sɩɩgã tɛ maam so-sõng zugu.

¹¹ Sẽn-Ka-Saabo, yãmb yʋʋrã yĩnga, bɩ y kõ-m vɩɩm! Yãmb tɩrlmã yĩnga, bɩ y yiis maam yel-pakrã pʋga!

¹² Yãmb nonglmã yĩnga, bɩ y kɩt tɩ m bɛɛbã noy mume. Bɩ y menes mam zabd-n-taasã zãnga, bala, mam yaa yãmb tʋmtʋmda.