Yɩɩn‑sõamyã 142 - WẼNNAAM SEBRE 2014

Ned sẽn kot Wẽnnaam tɩ b sõng-a

¹ A Davɩɩd sũur gomde. Yaa wakat ning a sẽn wa n be tãngã bokẽ wã. Yaa pʋʋsgo.

² Mam zẽkda m koɛɛg n boond Sẽn-Ka-Saabo, mam zẽkda m koɛɛg bãmb taoor n yõkd b sɛɛga.

³ Mam bee bãmb taoor n wilgd m kosgã, bãmb taoor la m togsd m yel-pakrã.

⁴ Mam daoodã sã n wa n sɛ zãnga, yãmb a Wẽnnaam mii mam sore. Bɛɛbã rɩgla bẽdg mam so-tũudgã zugu.

⁵ Wẽneg-y n ges-y mam nug-rɩtgo, ned ka be sẽn yet t'a mii maam ye. Mam ka leb n tar solgr zĩig ye. Ned baa a yembr toog ka be ne mam vɩɩmã ye.

⁶ Sẽn-Ka-Saabo, mam kelemd n boonda yãmba. Mam yetame: «Yãmb la mam zĩ-soalgdga, dũniyã zug ka, ninsaalb sʋka, yãmb la m fãa-fãa.»

⁷ Wʋm-y mam kɛlengã! Bala, mam pãngã sɛɛ zãnga. Fãag-y maam ne sẽn digd-b maamã. Bala, b pãngã yɩɩda maam.

⁸ Yiis-y maam bi-bees roogẽ, tɩ mam tõe n pʋʋs yãmb barka. Nin-tɩrsã na n wa gũbga maam, yãmb sẽn maan maam neerã yĩnga.