Yɩɩn‑sõamyã 140 - WẼNNAAM SEBRE 2014

Ned sẽn kot tɩ b fãag-a ne a bɛɛba

¹ A Davɩɩd yɩɩlle, yɩɩlã naab yĩnga.

² Sẽn-Ka-Saabo, fãag-y maam nin-wẽnsã nugẽ. Gũ-y maam ne nen-keglem soaba.

³ Nin-bãmb saagda saag-wẽns b sũyã pʋse, bãmb baooda zabr daar fãa.

⁴ Bãmb sɩlsda b zɛlmã wa wiisi, bãmb noyã pida ne põeer zẽnem.

⁵ Sẽn-Ka-Saabo, fãag-y maam nin-toaag nugẽ. Gũ-y maam ne nen-keglem soaba! Bãmb baoodame n dat n lub maam!

⁶ Wuk-m-mens rãmbã bẽta maam, bãmb gãnega wĩy la gãmbr sorã kɩrenga. Bãmb dɩgla bẽdg mam yĩnga.

⁷ La mam yeela Sẽn-Ka-Saab yaa: «Yãmb yaa mam Wẽnnaam!» Sẽn-Ka-Saabo, kɩll-y y tʋbr n kelg m se-yõkrã!

⁸ Wẽnnaam Sẽn-Ka-Saabo, yãmb yaa pãng sẽn fãagd maam. Zabr sã n yik daare, yãmb n lilld maam.

⁹ Sẽn-Ka-Saabo, da-y kõ-y nin-wẽnsã b sẽn datã ye. Da-y bas-y tɩ b sẽn set ne taabã pids tɩ b wa zẽkd b mens ye.

¹⁰ Kɩt-y tɩ nin-wẽnsã sẽn gũbg maamã no-beed lʋɩ b mens zutu.

¹¹ Bɩ bug-saal rʋʋg b zutu! Bɩ b kɩt tɩ b lʋɩ bugmẽ, bɩ b lʋɩ bog-zulung pʋg n da tõog n leb n yi ye.

¹² Bɩ tẽn-kãn-nedã ra paam zĩig tẽng zug ye. Wẽngã na n pʋga nen-keglem soab n ka bas ye.

¹³ Mam miime tɩ Sẽn-Ka-Saab n zabd n sõngd naong soaba, la bãmb n kaood nimbãan-ned bʋʋd tɩrga.

¹⁴ N-yẽe! Nin-tɩrsã na n pʋʋsa yãmb barka, Nin-tɩrsã na n zĩnda ne yãmba.