Yɩɩn‑sõamyã 14 - WẼNNAAM SEBRE 2014

Ninsaalbã tʋʋm-beedo

1 A Davɩɩd yɩɩlle, yɩɩlã naab yĩnga.

¹ A Davɩɩd yɩɩlle, yɩɩlã naab yĩnga. Yalem yeta a sũurẽ tɩ Wẽnnaam ka be ye. Bãmb tʋmda tʋʋm-põaasa, la b maand tʋʋm-beedo. Ned ba a yembr ka be n maand neer ye.

² La Sẽn-Ka-Saab bee saasẽ, n sulg n get ninsaalbã, n dat n bãng ned sã n bee bãmb sʋkã n tar yam n baood Wẽnnaam.

³ Bãmb fãa bʋdgame, bãmb fãa rɩka wẽng maaneg sore. Bãmb ned ba a yembr ka be n maand neer ye. Nin-yɛng meng ka be ye.

⁴ Sẽn-Ka-Saab yeelame yaa: «Rẽ yĩnga, tʋʋm-wẽns maandbã fãa ka tar bãngr la? Bãmb dɩta mam nebã wa b sẽn dɩt rɩɩbo. Bãmb ka tol n pʋʋsd Sẽn-Ka-Saab ye.»

⁵ Rẽ n kɩte, tɩ rabeem na n yõk bãmba. Bala, Sẽn-Ka-Saab bee ne nin-tɩrsã.

⁶ Yãmb yaanda nimbãan-neb saagre, la Sẽn-Ka-Saab yaa bãmb zĩ-soalgdga.

⁷ Kayto! Ãnda n na n zĩnd Sɩyõ n fãag Israyɛlle? Sẽn-Ka-Saab sã n yiis b nebã yembdã pʋga, a Zakoob yagensã na n kɩdmame, la Israyɛll na n maana sũ-noogo.