Yɩɩn‑sõamyã 139 - WẼNNAAM SEBRE 2014

Sẽn-Ka-Saab n mi bũmb fãa

1 A Davɩɩd yɩɩlle. Yaa yɩɩlã naab yĩnga.

¹ A Davɩɩd yɩɩlle. Yaa yɩɩlã naab yĩnga. Sẽn-Ka-Saabo, yãmb feesda maam, yãmb mii maam.

² Yãmb mii mam zĩndg la m yikr wakate, yãmb reng n bãnga mam tagsgã tɩ ket n zãra.

³ Yãmb feesda maam m kẽnd wakate, la m sẽn gãe n vʋʋsdẽ wakate. Yãmb mii mam manesmã fãa.

⁴ Sẽn deng tɩ gomd yi mam noorẽ, yãmb a Sẽn-Ka-Saab zoe n bãng-a-la fãa.

⁵ Yãmb gũbgda maam poorẽ la taoore, la yãmb nug bee mam zugu.

⁶ Yãmb sẽn mi maam zãng a woto wã yaa bõn-bãnd ne maam, a yaa kãseng n yɩɩd mam sẽn tõe n wʋm a võore.

⁷ Mam na n kẽnga yɛɛnẽ n zãag ne yãmba? Mam na n zoe n kẽe yɛɛnẽ n põs yãmba?

⁸ Baa mam sã n dʋ saasẽ, yãmb bee beenẽ. Ba mam sã n tɩʋ m gãagã kɩɩm-kulgu, yãmb leb n bee be.

⁹ Ba mam sã n deeg zĩ-yẽegr pɩgs n yɩk n kẽng ko-kãsengã rʋʋnde,

¹⁰ yãmb nug tɛta maam beenẽ me, la y nug-rɩtg gãta maam.

¹¹ Mam sã n yeel likã t'a wa lill maam, yʋngã lebgda vẽenem n gũbg maam.

¹² Baoosgo, likã ka lik ne yãmb ye, yʋngã yãgda wa wĩntoogo, la lik yaa wa vẽenem yãmb taoore.

¹³ Yãmb n naan maam wa m sẽn yalã, yãmb n yag maam m ma pʋgẽ.

¹⁴ Sẽn-Ka-Saabo, mam pʋʋsda yãmb barka, bala, yãmb naana maam tɩ m tar ra-sãnde, yãmb tʋʋmã yaa bõn-bãna, mam mii bõn-kãng sõama.

¹⁵ Mam yĩngã ka tar bũmb sẽn solg ne yãmb ye. Yãmb naana maam zĩ-soalgdgẽ. Yãmb wʋga maam tẽn-gãongã zĩ-zulumsẽ wã.

¹⁶ Mam sẽn wa n nan ka tar naande, yãmb dag n nee maam. Mam dasmã fãa rag n zoe n gʋlsa yãmb sebrẽ wã tɩ b ba a yembr dag n nan ka beẽ ye.

¹⁷ Mam Wẽnnaam, yãmb tagsdã võor wʋmb yaa toog wʋsg ne maam. Bãmb sõorã sɩd yaa wʋsgo.

¹⁸ Mam sã n na n sõd-ba, b sõorã yɩɩda bĩisrã. Mam sã n gũs n neke, m ket n bee ne yãmba.

¹⁹ Mam Wẽnnaam, m datẽ lame tɩ y sãam nin-wẽnsã! Nin-kʋʋdba, zãag-y ne maam!

²⁰ Mam Wẽnnaam, nin-wẽnsã gomda yãmb yell ne sɩlem-wẽnga, yãmb bɛɛbã sã n boond yãmb yʋʋrã, yaa ne zãmbo!

²¹ Sẽn-Ka-Saabo, mam ka tõe n ka kisg sẽn kis-b yãmbã ye. Mam yam ka tõe n ka yi neb nins sẽn zabd-b ne yãmbã ye.

²² Mam tolg n kis-b lame. Bãmb tolg n yaa mam bɛɛba.

²³ Mam Wẽnnaam, fees-y maam n bãng m sũ-zulmã. Fees-y maam n bãng m tagsgã.

²⁴ Ges-y tɩ mam sã n dɩka so-wẽnga, bɩ y tall maam sor sẽn paad wakat sẽn ka sɛtã zugu!