Yɩɩn‑sõamyã 138 - WẼNNAAM SEBRE 2014

Wẽnnaam bark pʋʋsg yɩɩlle

1 A Davɩɩd yɩɩlle.

¹ A Davɩɩd yɩɩlle. Sẽn-Ka-Saabo, mam na n pʋʋsa yãmb bark ne m sũur fãa. Mam na n yɩɩl n pẽga yãmb wẽnnam-dãmbã taoore.

² Mam na n wõgemd n teesa y ro-sõngã, n pʋʋs yãmb bark y nonglmã ne y sɩdã yĩnga. Bala, yãmb pidsa y goamã n yɩɩd tõnd sẽn dag n wʋmd tɩ b gomdã.

³ Mam sẽn bool yãmbã, y leok-m lame, yãmb kenga mam pɛlga, n paas-m pãnga.

⁴ Sẽn-Ka-Saabo, dũniyã rĩm-dãmb sã n wʋm yãmb noorã goamã, b na n pẽga yãmba.

⁵ Bãmb na n yɩɩl n goma Sẽn-Ka-Saab tʋʋmã yelle, bala, Sẽn-Ka-Saab ziirã yaa kãsenga.

⁶ Sẽn-Ka-Saab bee hal yĩngri, la b nee sik-m-mens rãmbã. Bãmb bee yɩɩga, la b mii wuk-m-mens rãmbã n bake.

⁷ Baa mam sã n kẽnd yel-pakr pʋga, yãmb n kõt maam vɩɩm. Mam bɛɛbã sũ-yikr pʋga, y tẽegda y nugu, yãmb tẽegda y nug-rɩtg n fãag maam.

⁸ Sẽn-Ka-Saab kɩtdame tɩ bũmb fãa baas neer mam yĩnga. Sẽn-Ka-Saabo, yãmb nonglmã paada wakat fãa! Ra-y bas-y neb nins yãmb meng nus sẽn naanã ye!