Yɩɩn‑sõamyã 136 - WẼNNAAM SEBRE 2014

Sẽn-Ka-Saab nonglmã paada wakat fãa

¹ Pʋʋs-y Sẽn-Ka-Saab bark b sõmblmã yĩnga, bala, bãmb nonglmã paada wakat fãa!

² Pʋʋs-y wẽnnaam-dãmb Wẽnnaamã barka, bala, bãmb nonglmã paada wakat fãa!

³ Pʋʋs-y zu-soben-dãmb Zu-soabã barka, bala, bãmb nonglmã paada wakat fãa!

⁴ Bãmb b yembr bal n maand bõn-bãn-kãsemse, bala, bãmb nonglmã paada wakat fãa!

⁵ Bãmb n naan saasẽ ne yam, bala, bãmb nonglmã paada wakat fãa!

⁶ Bãmb n yɛdg tẽn-gãongã koomã zugu, bala, bãmb nonglmã paada wakat fãa!

⁷ Bãmb n naan yĩngr vẽen-kãsemsã, bala, bãmb nonglmã paada wakat fãa!

⁸ Bãmb n naan wĩntoog t'a soog wĩndga, bala, bãmb nonglmã paada wakat fãa!

⁹ Bãmb n naan kiuugã ne ãdsã tɩ b soog yʋngo, bala, bãmb nonglmã paada wakat fãa!

¹⁰ Bãmb kʋʋ Ezɩpt nebã kom-dẽemsã, bala, bãmb nonglmã paada wakat fãa!

¹¹ Bãmb n yiis Israyɛll nebã Ezɩpt tẽnga, bala, bãmb nonglmã paada wakat fãa!

¹² Bãmb tẽega b nugã n yiis bãmb ne kang sẽn tar pãnga, bala, bãmb nonglmã paada wakat fãa!

¹³ Bãmb n kɩt tɩ rudum ko-kãsengã koom pasg zĩis a yiibu, bala, bãmb nonglmã paada wakat fãa!

¹⁴ Bãmb n kɩt tɩ Israyɛll kambã pɩʋʋg koomã n looge, bala, bãmb nonglmã paada wakat fãa!

¹⁵ Bãmb n luba Faarõ ne a tãb-biisã rudum ko-kãsengã pʋga, bala, bãmb nonglmã paada wakat fãa!

¹⁶ Bãmb n yãag b nebã we-raoogã pʋga, bala, bãmb nonglmã paada wakat fãa!

¹⁷ Bãmb n kʋ rĩm-kãsemse, bala, bãmb nonglmã paada wakat fãa!

¹⁸ Bãmb n kʋ rĩm-dãmb sẽn tar pãense, bala, bãmb nonglmã paada wakat fãa!

¹⁹ Yaa Amoor-dãmbã rĩm a Sihon, bala, bãmb nonglmã paada wakat fãa!

²⁰ Ne Basã tẽngã rĩm a Ooge, bala, bãmb nonglmã paada wakat fãa!

²¹ N dɩk b tẽmsã n kõ Israyɛll sẽn yaa bãmb meng nebã tɩ b sooge, bala, bãmb nonglmã paada wakat fãa!

²² B rɩka tẽn-bãmb n kõ b tʋmtʋmd a Israyɛll tɩ yɩ a pʋɩɩre, bala, bãmb nonglmã paada wakat fãa!

²³ Tõnd sẽn wa n be d yembdã pʋgã, Sẽn-Ka-Saab tẽega tõnd yelle, bala, bãmb nonglmã paada wakat fãa!

²⁴ Bãmb n fãag tõnd d bɛɛbã nusẽ, bala, bãmb nonglmã paada wakat fãa!

²⁵ Bãmb n kõt bõn-vɩɩlɩ wã fãa rɩɩbo, bala, bãmb nonglmã paada wakat fãa!

²⁶ Pʋʋs-y saasẽ Wẽnnaamã barka, bala, bãmb nonglmã paada wakat fãa!