Yɩɩn‑sõamyã 135 - WẼNNAAM SEBRE 2014

Sẽn-Ka-Saab pẽgr yɩɩlle

¹ Pẽg-y Sẽn-Ka-Saabo! Pẽg-y Sẽn-Ka-Saab yʋʋrã! Sẽn-Ka-Saab tʋmtʋmdba, pẽg-y bãmba!

² Yãmb dãmb sẽn be tõnd Wẽnnaamã roogẽ wã, pẽg-y bãmba!

³ Pẽg-y Sẽn-Ka-Saab tɩ b pida ne sõmblem. Yɩɩl-y n pẽg-y b yʋʋrã tɩ b yʋʋrã yaa noogo.

⁴ Bala, Sẽn-Ka-Saab yãka a Zakoobe, tɩ Israyɛll lebg bãmb dẽnda.

⁵ Mam mii hakɩɩk tɩ Sẽn-Ka-Saab yaa kãsenga, tɩ tõnd Zu-soabã yɩɩda wẽnnaam-dãmbã fãa.

⁶ Sẽn-Ka-Saab sẽn dat bũmb ning fãa, b maandame, sã n yaa saasẽ, wall dũniyã zugu, sã n yaa ko-kãsengẽ wã, wall zĩ-zulumsẽ wã.

⁷ Sẽn-Ka-Saab n kɩtd tɩ sawatã zẽkd n tat dũniyã zĩig fãa, la b kɩtdẽ tɩ sa-yãgb wat ne sa-koom, n kɩtdẽ tɩ sobg yit b sẽn dag n bĩng-a zĩig ningã.

⁸ Bãmb n kʋ Ezɩpt tẽngã kom-dẽemsã, sẽn sɩng ne ninsaalb n tɩ tãag rũmsã.

⁹ Ezɩpt nebã, bãmb tʋma bãn ne bõn-bãn yãmb sʋka, n sɩbga Faarõ ne a tʋmtʋmdbã fãa.

¹⁰ Bãmb tõoga bu-zẽms wʋsgo, n kʋ rĩm-dãmb sẽn tar pãense.

¹¹ Yaa Amoor-dãmbã rĩm a Sɩhon, ne Basã-rãmbã rĩm a Ooge, la Kana soolem dĩm-dãmbã fãa.

¹² La b rɩka b tẽmsã n kõ Israyɛll sẽn yaa bãmb nebã tɩ lebg b soolem.

¹³ Sẽn-Ka-Saabo, yãmb yʋʋrã paada wakat fãa! Sẽn-Ka-Saabo, b na n tẽra yãmb yell zamaan woo zamaane!

¹⁴ Bala, Sẽn-Ka-Saab na n kao b nebã bʋʋdo, la b na n zoe b tʋmtʋmdbã nimbãanega.

¹⁵ Bu-zẽmsã wẽn-naands maana ne wanzuri la sãnem, bãmb yaa ninsaalb nus tʋʋmã.

¹⁶ Bãmb tara noore, la b ka gomd ye. B tara nini, la b ka ne ye.

¹⁷ Bãmb tara tʋb la b ka wʋmd ye. Pemsem buud ka tol n yit b noorẽ wã ye.

¹⁸ Sẽn naan-b bãmbã ne sẽn teeg-b bãmbã fãa na n yɩɩ wa bãmba.

¹⁹ Israyɛll buudu, pẽg-y Sẽn-Ka-Saabo! A Aarõ buudu, pẽg-y Sẽn-Ka-Saabo!

²⁰ Leevi buudu, pẽg-y Sẽn-Ka-Saabo! Yãmb dãmb sẽn zoet Sẽn-Ka-Saabo, pẽg-y bãmba!

²¹ Bɩ Sẽn-Ka-Saab paam pẽgr sẽn yit Sɩyõ! Bãmb bee Zeruzalɛm! Pẽg-y Sẽn-Ka-Saabo!