Yɩɩn‑sõamyã 132 - WẼNNAAM SEBRE 2014

Sɩyõ yaa Sẽn-Ka-Saab tẽnga

1 Zeruzalɛm kẽnd yɩɩlle.

¹ Zeruzalɛm kẽnd yɩɩlle. Sẽn-Ka-Saabo, tẽeg-y-yã a Davɩɩd yelle, tẽeg-y-yã a namsgã fãa yelle.

² A Davɩɩd wẽena ne Sẽn-Ka-Saabo. Yẽnda pʋlma a Zakoob Wẽnnaamã sẽn yaa pãn-kãseng soabã n yeele:

³ «Mam ka na n kuil m yiri, mam ka na n tɩ gãand m gãagẽ,

⁴ mam kõn bas tɩ gõeem yõk-ma, la m nin kõn tol n suusi,

⁵ sã n ka m wa n paama zĩig Sẽn-Ka-Saab yĩnga, sã n ka m wa n paama roog a Zakoob Wẽnnaamã sẽn yaa pãn-kãseng soabã yĩng ye.

⁶ Tõnd wʋmame tɩ b gomda, tɩ kaoolã koglgã paa Efrata. Tõnd tɩ yãnd-a-la Yaar tẽnga.

⁷ D kẽng Sẽn-Ka-Saab roogẽ wã, n tɩ wõgemd bãmb nao-roagendgã taoore!

⁸ Sẽn-Ka-Saabo, yik-y-yã! Wa-y n kẽ-y y vʋʋsg zĩigẽ wã, yãmb ne y kaoolã koglgã sẽn wilgd yãmb pãngã!

⁹ Bɩ yãmb maan-kʋʋdbã yeelg tɩrlem, la bɩ y nin-nongdsã kaas ne sũ-noogo!

¹⁰ Yãmb tʋmtʋmd a Davɩɩd maasem yĩnga, bɩ y ra zãgs y nin-tũusdgã ye!

¹¹ Sẽn-Ka-Saab wẽena ne a Davɩɩde, la b kõn lebs b noor poorẽ ye.» Bãmb yeela a Davɩɩd yaa: «Mam na n kɩtame tɩ fo yageng led foom f zaoorẽ wã.

¹² Fo kambã sã n sak n tũ mam kaoolã, ne kaset ning mam sẽn na n zãms bãmbã, bãmb kambã me na n wa zaoonda fo zaoorẽ wã wakat sẽn kõn sɛ yĩnga.

¹³ Bala, Sẽn-Ka-Saab yãka Sɩyõ, n na n kɩt tɩ beenẽ yɩ b yiri.»

¹⁴ Bãmb yeelame: «Zĩ-kãngã na n yɩɩ mam vʋʋsg zĩig wakat fãa yĩnga. Mam na n zĩnda ka, bala, yaa ka la m data.

¹⁵ Mam na n ninga Sɩyõ laogã barka, la m kɩt t'a nimbãan-nebã rɩ n tɩge.

¹⁶ Mam na n yeelga a maan-kʋʋdbã ne fãagre, la a nin-nongdsã na n kaasa ne sũ-noogo!

¹⁷ Mam na n kɩtame tɩ rĩm sẽn tar pãng puk Sɩyõ, a Davɩɩd yagensã sʋka. Mam na n segla fɩtl mam nin-tũusdgã yĩnga.

¹⁸ Mam na n yeelga yẽnda bɛɛbã yãnde, la yẽnda na n fõgna naam maanf sẽn pɩndã.»