Yɩɩn‑sõamyã 128 - WẼNNAAM SEBRE 2014

Sẽn-Ka-Saab zoees kõta sũ-noogo

1 Kẽnd yɩɩlle.

¹ Kẽnd yɩɩlle. Sẽn zoet-b Sẽn-Ka-Saab la b kẽnd bãmb soayã zutã tara sũ-noogo.

² Fo na n dɩ f tʋʋmdã yõodo. Fo na n paama sũ-noogo, la naar yaa foom n so!

³ Fo pagã wẽnda reezẽ tɩ-woamdga, n be fo roogã yaanga, tɩ fo kambã yaa wa oliiv tɩ-bãoonego, n gũbg n dɩt ne foom.

⁴ Sẽn zoet-a Sẽn-Ka-Saab na n paama bark a woto.

⁵ Bɩ Sẽn-Ka-Saab kɩt tɩ b barkã yi Sɩyõ n ta foom, la fo na n yãnda Zeruzalɛm naarã f vɩɩmã tõre.

⁶ Fo na n yãnda f kambã kamba. Bɩ Israyɛll zĩnd ne bãane!