Yɩɩn‑sõamyã 119 - WẼNNAAM SEBRE 2014

Sẽn-Ka-Saab tõodã kõta sũ-noogo

¹ Bark bee neb nins sẽn kẽnd ne burkĩndã zutu, neb nins sẽn kẽnd wa sẽn zems Sẽn-Ka-Saab tõogã!

² Bark bee neb nins sẽn sakd bãmb no-tũudsã zutu, neb nins sẽn baood bãmb ne b sũyã fãa wã!

³ Bãmb ka maand wẽng ye. Bãmb kẽnda wa Sẽn-Ka-Saab sẽn datã.

⁴ Yãmb a Sẽn-Ka-Saab vigla y no-tũudsã, tɩ b tõe n sak-b neere.

⁵ Mam dat n gũusa ne m manesem, n tõog n sak yãmb tõodã!

⁶ Mam sã n sakd yãmb noyã zãnga, mam kõn tol n paam yãnd ye.

⁷ Mam na n pẽga yãmb ne pʋ-peelem, la m zãmsd yãmb tɩrlem no-tũudsã.

⁸ Mam dat n saka yãmb noyã. Bɩ y ra tol n bas-m fasɩ ye.

⁹ Bi-bɩɩg na n maana a wãn t'a manesem zemse? Yaa a sẽn na n sakd yãmb goamã.

¹⁰ Mam baooda yãmb ne m sũur fãa. Ra bas-y maam tɩ m bʋdg n bas yãmb noyã ye.

¹¹ Mam bĩngda yãmb goamã m sũurẽ, sẽn na yɩl n da wa maan yel-wẽn n kong ne yãmb ye.

¹² Sẽn-Ka-Saabo, bɩ y paam pẽgre! Bɩ y zãms maam yãmb no-tũudsã!

¹³ Mam noorã na n togsa tõod nins fãa sẽn yit yãmb noorẽ wã.

¹⁴ Mam sã n sakd yãmb noyã, mam tara sũ-noogo, tɩ yaa wa mam paama arzegs buud fãa.

¹⁵ Mam tagsda yãmb no-tũudsã yelle, la m get yãmb soayã y sẽn wilgd maamã.

¹⁶ Mam sũur yaa noog tɩ sak yãmb no-tũudsã, la m kõn tol n yĩm yãmb goamã yell ye.

¹⁷ Maan-y mam sẽn yaa yãmb tʋmtʋmdã neere, tɩ m tõe n vɩɩmde, la m sak yãmb goamã!

¹⁸ Puk-y m ninã tɩ m tõe n yã yãmb tõogã bõn-bãnã!

¹⁹ Mam yaa sãan dũniyã ka, ra solg-y y noyã ne maam ye.

²⁰ Yãmb no-tũudsã bãngr datem dɩta maam wakat fãa wa bugum.

²¹ Yãmb lengda wuk-m-mens rãmbã, kãab-wẽng sẽn be b rãmb zutã, neb nins sẽn bʋdg n bas yãmb noyã.

²² Yiis-y maam paoogrã ne yaalgã pʋga, bala, mam wɩngda ne yãmb no-tũudsã sakre.

²³ Nanambsã nong bɩ b zĩnd n gom mam yell wẽnga, yãmb tʋmtʋmdã tagsda yãmb noyã yelle.

²⁴ Yãmb no-tũudsã kõta maam sũ-noogo. Bãmb n sagend maam.

²⁵ Mam bilimda tomẽ. Sõng-y-m tɩ m vɩɩmd wa sẽn zems yãmb goamã!

²⁶ Mam togsa yãmb m manesmã, la yãmb leoka maam. Zãms-y maam yãmb noyã!

²⁷ Sõng-y-m tɩ m wʋm yãmb no-tũudsã võore, tɩ m tõe n tags y bõn-bãnã yelle!

²⁸ Mam yãbda ne sũ-sãanga. Leb-y n paas-y maam pãng wa sẽn zems yãmb goamã!

²⁹ Zãag-y maam ne zĩrẽ sore, la y zoe m nimbãaneg n sõng-m tɩ m sak yãmb tõogã.

³⁰ Mam yãka yam n na n tũ pʋ-peelem sore. Mam sakda yãmb no-tũudsã.

³¹ Mam loeta m meng ne yãmb no-tũudsã. Sẽn-Ka-Saabo, da ning-y maam yãnd ye!

³² Mam zoeta yãmb noyã sor zugu, bala, yãmb yoka mam yamã.

³³ Sẽn-Ka-Saabo, zãms-y maam y tõodã soayã, tɩ mam tõe n tall-b m vɩɩm tɛka.

³⁴ Kɩt-y tɩ m wʋm yãmb tõogã võore, tɩ m tõe n bĩng-a, la m sak-a ne m sũur fãa.

³⁵ Kɩt-y tɩ m kẽn yãmb noyã sor zugu! Bala, mam sũur nooma ne-ba.

³⁶ Wẽnemd-y m sũurã tɩ m sak y no-tũudsã, la y ra wẽnemd m sũurã n tees zãmb arzegs ye.

³⁷ Bɩ y kɩt tɩ m wẽnemd n da ges bũmb nins sẽn ka tar yõodã ye. La y sõng-m tɩ m vɩɩmd wa sẽn zemsd yãmb daabã!

³⁸ Mam yaa yãmb tʋmtʋmda, pids-y yãmb sẽn kãab maam bũmb ningã, tɩ nebã na zoe yãmba!

³⁹ Zãag-y maam ne paoogrã mam sẽn zoetã. Bala, yãmb bʋʋdã yaa sõama.

⁴⁰ Mam sesdame n dat yãmb no-tũudsã. Kɩt-y tɩ m vɩɩmd yãmb tɩrlmã pʋga!

⁴¹ Sẽn-Ka-Saabo, wilg-y y nonglmã ne maam, la y fãag maam wa sẽn zems yãmb sẽn dag n kãabã!

⁴² Tɩ mam tõe n leok neb nins sẽn paoogd maamã, bala, mam teega yãmb goamã.

⁴³ Ra yiis-y sɩd-goamã mam noorẽ ye, bala, mam gũuda yãmb bʋ-kaoorã.

⁴⁴ Mam na n saka yãmb tõogã wakat fãa n ka bas ye.

⁴⁵ Mam na n kẽna lohorem pʋgẽ, bala, mam baooda yãmb no-tũudsã.

⁴⁶ Mam na n kɩsa yãmb kasetã rĩm-dãmb taoore, n ka tol n zoe yãnd ye.

⁴⁷ Mam maanda sũ-noog ne yãmb noyã. Mam nong-b-la hal wʋsgo.

⁴⁸ Mam zẽkda m nus n teesd yãmb noyã m sẽn nongã, la mam tagsda yãmb noorã y sẽn yiisã yelle.

⁴⁹ Tẽeg-y gomd ning yãmb sẽn dag n gom ne y tʋmtʋmdã yelle. Bala, gom-kãng kõo maam tẽebo!

⁵⁰ Bõn-kãng n belsd maam m nimbãanegã pʋga. Yãmb sẽn yeelã n kõt maam vɩɩm.

⁵¹ Baa ne tɩtaam dãmbã sẽn paoogd maamã, mam ka basd yãmb tõogã ye.

⁵² Sẽn-Ka-Saabo, mam ket n tẽra yãmb bʋ-kaoorã yãmb sẽn maan pĩndã yelle, n paamd belsgo.

⁵³ Mam sã n get nin-wẽnsã sẽn basd yãmb tõogã, mam sũur puuda wʋsgo.

⁵⁴ Mam sãandã weoogo, yaa yãmb sẽn yiis noy ninsã n lebg mam yɩɩl tɩ m yɩɩndẽ.

⁵⁵ Sẽn-Ka-Saabo, yʋngo mam tẽegda yãmb yʋʋrã yelle, la m sakda yãmb tõogã.

⁵⁶ Ad bũmb ning sẽn pak maam, yaa tɩ sak yãmb no-tũudsã.

⁵⁷ Sẽn-Ka-Saabo, mam yetame, mam pʋɩɩr yaa tɩ sak yãmb goamã.

⁵⁸ Mam baooda ne m sũur fãa, n dat n ta yãmb yam, Zoe-y m nimbãanega, wa yãmb sẽn kãabã!

⁵⁹ Mam tagsa m manesmã yelle, n na n wẽnemd n kẽn wa sẽn zems yãmb kasetã.

⁶⁰ Mam yãgdame n sakd yãmb noyã, n ka basdẽ tɩ kaoosdẽ ye.

⁶¹ Nin-wẽnsã bẽdg yõka maam, la mam ka yĩmd yãmb tõogã yell ye.

⁶² Mam yikda yʋn-sʋk n pʋʋsd yãmb barka, yãmb bʋ-kaoorã sẽn yaa tɩrgã yĩnga.

⁶³ Mam yaa neb nins fãa sẽn zoet yãmb la b sakd yãmb no-tũudsã zoa.

⁶⁴ Sẽn-Ka-Saabo, yãmb nonglmã pida dũniyã gilli. Zãms-y maam tɩ m bãng y tʋlsmã!

⁶⁵ Sẽn-Ka-Saabo, yãmb maana mam sẽn yaa y tʋmtʋmdã neere, wa yãmb sẽn dag n kãabã.

⁶⁶ Zãms-y maam tɩ m paam yam la bãngre, bala, mam kɩsa sɩd ne yãmb noyã.

⁶⁷ Sẽn deng toogã sẽn na n paam maam, mam dag n kẽe moogo. La moasã, mam sakda yãmb sẽn yeelã.

⁶⁸ Yãmb yaa sõmblem soaba, la maan-neer soaba. Zãms-y maam y tʋlsmã.

⁶⁹ Wuk-m-mens rãmbã yagda zĩrẽ n sãamd mam yʋʋre, la mam sakda yãmb no-tũudsã ne m sũur fãa.

⁷⁰ Nin-bãmb yamã gũsa wa kaam. La yãmb tõogã sakr n kõt maam sũ-noogo.

⁷¹ Toogã sẽn paam maamã manega maam, yaa tɩ mam na zãms n bãng yãmb noyã.

⁷² Yãmb sẽn kõ tõod ninsã tara yõod ne maam, n yɩɩd sãnem ne wanzuri teed tusa.

⁷³ Yaa yãmb nus n naan maam, n kõt maam pãnga. Kõ-y maam yam tɩ m zãms yãmb tõodã.

⁷⁴ Neb nins sẽn zoet yãmbã sã n yãnd maam, b maanda sũ-noogo. Bala, mam tẽeda yãmb goamã.

⁷⁵ Sẽn-Ka-Saabo, mam miime tɩ yãmb bʋ-kaoorã yaa tɩrga, la yãmb tara bʋʋm la y sẽn sɩbg maamã.

⁷⁶ Bɩ y maan-neerã bels maam, wa yãmb sẽn dag n kãab y tʋmtʋmdã.

⁷⁷ Bɩ y maan nimbãan-zoeer ne maam tɩ m tõe n vɩɩmde. Bala, yãmb tõogã n kõt maam sũ-noogo.

⁷⁸ Bɩ y ning wuk-m-mens rãmbã sẽn namsd maam zaalmã yãnde! Mam tagsda yãmb no-tũudsã yelle.

⁷⁹ Bɩ sẽn zoet-b yãmbã ne neb nins sẽn mi-b yãmb tʋlsmã wẽnemd n wa mam nengẽ.

⁸⁰ Mam na n saka y noyã ne m sũur fãa, n da wa paam yãnd ye.

⁸¹ Mam namsdame n baood yãmb fãagrã, la mam gũuda yãmb goamã ne tẽebo.

⁸² Mam gũu yãmb goamã tɩ mam ninã pãng sɛ, tɩ mam sokdẽ: Dabʋr la yãmb na n bels maam?

⁸³ Baa mam sã n wa n lebg wa ko-waoog bug-zõos sẽn kʋɩɩse, mam ka yĩmd yãmb tõodã yell ye.

⁸⁴ Mam na n vɩɩmda yʋʋm wãna? Dabʋr la y na n bʋ mam namsdbã bʋʋdo?

⁸⁵ Wuk-m-mens rãmbã tuuda bogd mam taoore, n kɩɩsd yãmb tõogã.

⁸⁶ Yãmb noyã zãng wilgda yãmb nonglmã. Sõng-y maam tɩ b namsd-m-la zaalem!

⁸⁷ Kellẽ-la bilf tɩ b menesẽ maam. La mam ka basd yãmb no-tũudsã sakr ye.

⁸⁸ Sõng-y maam tɩ m vɩɩmd wa sẽn zems y nonglmã, tɩ m tõe n sak yãmb noorã sẽn togsã.

⁸⁹ Sẽn-Ka-Saabo, yãmb goamã bee saasẽ wakat fãa.

⁹⁰ Yãmb maan-sɩdã paada zamaan woo zamaane. Yãmb n vigl tẽn-gãongã t'a beẽ.

⁹¹ Yaa yãmb bʋ-kao-tɩrgã yĩng la bũmbã fãa be rũndã. Bala, bũmbã fãa tʋmda yãmb yĩnga.

⁹² Sã n ka mam sẽn nong yãmb tõogã yĩnga, toogã rag n na n loogẽ-la ne maam.

⁹³ Mam kõn tol n yĩm yãmb noyã yell ye. Bala, yãmb tũnuga bãmb n kõ maam vɩɩm.

⁹⁴ Fãag-y maam tɩ yãmb n so maam. Bala, mam baood n saka yãmb noyã.

⁹⁵ Nin-wẽnsã gũuda maam n dat n menes maam, la mam kelgda yãmb noyã.

⁹⁶ Mam yãame tɩ baa bũmb nins fãa sẽn zems zãngã tara tɛka, la yãmb tõogã ka tar tɛk ye.

⁹⁷ Mam sɩd nonga yãmb tõogã! Mam tagsda a yell n ka basdẽ ye.

⁹⁸ Yãmb tõogã kõta maam yam n yɩɩd m bɛɛbã, bala, mam tar-a-la wakat fãa.

⁹⁹ Mam tara yam n yɩɩd m zu-soben-dãmbã, bala, yaa yãmb noyã yell bal la mam tagsda.

¹⁰⁰ Mam tara bãngr n yɩɩd nin-kẽemba, bala, mam sakda yãmb noyã.

¹⁰¹ Mam gũusdame n ka rɩkd wẽng maaneg sore, sẽn na n yɩl n sak yãmb goamã.

¹⁰² Mam tũuda yãmb no-tũudsã, bala, yãmb n zãms-b maam.

¹⁰³ Yãmb goamã nooma mam noorẽ, n yɩɩd sɩɩd sẽn be mam dagsendakẽ.

¹⁰⁴ Yãmb no-tũudsã kõta maam bãngre, la mam kisa zĩrẽ buud fãa.

¹⁰⁵ Yãmb goamã yaa fɩtl mam kẽnd pʋga, a yaa vẽenem mam sor zugu.

¹⁰⁶ Mam wẽen n pidsame, tɩ m na n saka yãmb tɩrlem bʋ-kaoorã.

¹⁰⁷ Sẽn-Ka-Saabo, mam bee sũ-sãan-kãseng pʋga, sõng-y maam tɩ m vɩɩmd wa sẽn zems yãmb sẽn kãabã!

¹⁰⁸ Sẽn-Ka-Saabo, mam kot-y lame, tɩ y sak n deeg m bark pʋʋsgã tɩ yɩ kũuni, la y zãms maam y tɩrlem bʋ-kaoorã!

¹⁰⁹ Mam vɩɩmã bee yell pʋg wakat fãa, la mam ka yĩmd yãmb tõogã yell ye.

¹¹⁰ Nin-wẽnsã bẽta maam kũusri, la mam ka bʋdgd n basd yãmb no-tũudsã ye.

¹¹¹ Yãmb tʋlsmã n yaa mam pʋɩɩr wakat fãa, bãmb n noogd mam sũuri.

¹¹² Mam modgdame n sakd yãmb noyã. Bõn-kãng n yaa mam keoor wakat fãa.

¹¹³ Mam kisa yam a yiib rãmbã, la m nonga yãmb tõogã.

¹¹⁴ Yãmb yaa mam zĩ-soalgdga, la m gãongo, Mam tẽeda yãmb goamã.

¹¹⁵ Tʋʋm-wẽns maandba, loog-y n bas-y maam, tɩ mam tõe n sak m Wẽnnaamã noyã!

¹¹⁶ Tebend-y maam wa sẽn zems y sẽn kãabã, tɩ m tõe n vɩɩmde. Da ning-y maam yãnd m tẽeb-gũudmã pʋg ye.

¹¹⁷ Tebend-y maam tɩ m tõe n paam fãagre, la tɩ m tõe n get yãmb noyã wakat fãa!

¹¹⁸ Yãmb ka reegd neb nins sẽn bʋdgd n basd yãmb noyã ye. Bala, bãmb sɩlmã fãa yaa zaalem.

¹¹⁹ Yãmb menesda dũniyã nin-wẽnsã wa sagdo. Rẽ n kɩt tɩ mam nong yãmb tʋlsem.

¹²⁰ Mam sẽn zoet yãmbã yĩng kɩtame tɩ mam digda. Yãmb bʋ-kaoorã kẽesda maam dabeem.

¹²¹ Mam vɩɩmda zemsgo, la tɩrlem pʋga. Da bas-y maam m namsdbã nusẽ ye.

¹²² Gũ-y mam sẽn yaa yãmb tʋmtʋmdã n kɩt tɩ m yɩ neere. Tɩ wuk-m-mens rãmbã ra leb n nams maam ye.

¹²³ Mam nin pãng rat n sɛɛ yãmb fãagrã ne y tɩrlmã kãabg baoob yĩnga.

¹²⁴ Maan-y mam sẽn yaa yãmb tʋmtʋmdã wa sẽn zems y nonglmã. Zãms-y maam y noyã!

¹²⁵ Mam yaa yãmb tʋmtʋmda. Bɩ y kõ maam yam, tɩ m bãng yãmb tʋlsem.

¹²⁶ Sẽn-Ka-Saabo, wakat taame tɩ y tog n maan bũmbu. Bala, b sãamda yãmb tõogã.

¹²⁷ Yaa rẽ n kɩt tɩ mam nong yãmb noyã, n yɩɩd sãnem halaale.

¹²⁸ Rẽ kɩtame tɩ bũmbã fãa pʋgẽ, mam getame tɩ yãmb no-tũudsã n yaa tɩrse, la mam kisa zĩrẽ-beed buud fãa.

¹²⁹ Yãmb tʋlsmã yaa sõama, rẽ n kɩt tɩ mam sakd-ba.

¹³⁰ Sẽn bãng-a yãmb goamã paamda vẽnegre. Yãmb goamã wekda sẽn be-b zɩɩlem pʋgẽ wã yam.

¹³¹ Mam yaagda m noor n sesdẽ, yãmb noyã yamleoog sẽn tar maamã yĩnga.

¹³² Wẽnemd-y n ges-y maam, n zoe m nimbãanega, wa sẽn zems y tɩrlmã y sẽn maand neb nins sẽn nong yãmb yʋʋrã yĩngã.

¹³³ Paas-y maam pãng wa y sẽn yeelã, la y ra bas tɩ wẽng ba a yembr soog-m ye.

¹³⁴ Fãag-y maam ne ninsaalbã namsgo, tɩ mam tõe n sak yãmb no-tũudsã.

¹³⁵ Kɩt-y tɩ y nengã vẽenem yãg n bui mam sẽn yaa yãmb tʋmtʋmdã. Zãms-y maam tɩ m sak yãmb noyã.

¹³⁶ Mam nintãm daagdame, nebã sẽn ka sakd yãmb tõogã yĩnga.

¹³⁷ Sẽn-Ka-Saabo, yãmb yaa tɩrga, la yãmb bʋ-kaoorã yaa tɩrga.

¹³⁸ Yãmb kõ y kasetã ne tɩrlem, la ne maan-sɩd meng-menga.

¹³⁹ Mam bɛɛbã yĩmda yãmb goamã yelle, la bõn-kãng kɩtame tɩ nonglem-kãseng ning mam sẽn tar yãmb yĩngã rɩt maam wa bugum.

¹⁴⁰ Yãmb gomdã zemsa zãnga, rẽ kɩtame tɩ mam sẽn yaa yãmb tʋmtʋmdã nong-a.

¹⁴¹ Mam yaa bilf tɩ b pa nand-m ye. La mam ka yĩmd yãmb noyã yell ye.

¹⁴² Yãmb tɩrlmã n yaa tɩrlem sẽn paad wakat fãa, la yãmb tõogã yaa sɩda.

¹⁴³ Yel-pakr la sũ-sãang n tar maam. La yãmb noyã n kõt maam sũ-noogo.

¹⁴⁴ Yãmb tʋlsmã yaa tɩrs wakat sẽn kõn sa, yok-y mam yamã tɩ m wʋm b võor n tõog n vɩɩmde!

¹⁴⁵ Sẽn-Ka-Saabo, mam boonda yãmb ne m sũur fãa, bɩ y leok-ma, tɩ m tõe n sak yãmb noyã.

¹⁴⁶ Mam boonda yãmba, fãag-y-ma, tɩ mam tõe n maan yãmb tʋlsmã.

¹⁴⁷ Mam sãta beoog n boondẽ. La mam maanda tẽeb ne yãmb goamã.

¹⁴⁸ Mam pukda m nin tɩ beoog nan ka vẽeg ye, n na n tags yãmb sẽn kãabã yelle.

¹⁴⁹ Sẽn-Ka-Saabo, bɩ y kelg maam wa sẽn zems y nonglmã, sõng-y-m tɩ m vɩɩmd wa sẽn zems y tɩrlem bʋ-kaoorã!

¹⁵⁰ Sẽn tʋmd-b tʋʋm-wẽnsã kolgda maam, b zãagda b mens ne yãmb tõogã.

¹⁵¹ Sẽn-Ka-Saabo, yãmb bee mam sɛɛgẽ, la yãmb noyã fãa yaa sɩd bala.

¹⁵² Mam miime tɩ hal kʋdem-wẽndẽ, yãmb vigla y tʋlsmã wakat sẽn kõn sɛ yĩnga.

¹⁵³ Ges-y mam namsgã, la y fãag-ma, bala, mam ka yĩmd yãmb tõogã yell ye.

¹⁵⁴ Zab-y n sõng-y-ma, la y fãag-ma. Sõng-y-m tɩ m vɩɩmd wa sẽn zems yãmb kãabgã.

¹⁵⁵ Fãagrã zãra ne nin-wẽnse, bala, b ka baood n na n sak yãmb noyã ye.

¹⁵⁶ Sẽn-Ka-Saabo, yãmb nimbãan-zoeerã yaa kãsenga! Sõng-y-m tɩ m vɩɩmd wa sẽn zems yãmb tɩrlem bʋ-kaoorã!

¹⁵⁷ Mam namsdbã ne m bɛɛbã yaa wʋsgo. La mam ka basd yãmb tʋlsmã ye.

¹⁵⁸ Mam sẽn get zãmb-dãmbã, mam yam yii ne bãmba, b sẽn ka sakd yãmb sẽn yeelã yĩnga.

¹⁵⁹ Bɩ y gese, mam nonga yãmb no-tũudsã, sõng-y-m tɩ m vɩɩmd wa sẽn zemsd yãmb nonglmã.

¹⁶⁰ Yãmb goamã fãa yaa sɩda, la yãmb bʋ-kao-tɩrgã fãa paada wakat sẽn kõn sɛ.

¹⁶¹ Nanambs namsda maam zaalem. La mam sẽn zoet yaa yãmb goamã bala.

¹⁶² Mam sũur nooma ne yãmb sẽn kãabã, tɩ yaa wa ned sẽn paam te-zɛɛdem wʋsgo.

¹⁶³ Mam kisa zĩrẽ-beedo, la m yam yii ne-a. Mam sẽn nong yaa yãmb tõogã.

¹⁶⁴ Mam pẽgda yãmb naoor a yopoe daar fãa, yãmb bʋ-kao-tɩrsã yĩnga.

¹⁶⁵ Sẽn nong-b yãmb tõogã vɩɩ ne bãan meng-menga, la bũmb ka be n tõe n lub bãmb ye.

¹⁶⁶ Sẽn-Ka-Saabo, mam maanda tẽeb ne yãmb fãagrã, la m sakd yãmb noyã.

¹⁶⁷ Mam maanda yãmb tʋlsmã, la m nong-b-la hal wʋsgo.

¹⁶⁸ Mam tũuda yãmb no-tũudsã ne y tʋlsmã, bala, mam yel-manesmã fãa bee yãmb taoore.

¹⁶⁹ Sẽn-Ka-Saabo, wʋm-y mam kɛlengã! Kõ-y maam bãngr wa sẽn zems yãmb goamã!

¹⁷⁰ Bɩ mam kosgã zẽk n ta y nengẽ! Fãag-y maam wa yãmb sẽn kãabã!

¹⁷¹ Bɩ mam noorã kils n waoog-yã, bala, yãmb zãmsda maam y noyã.

¹⁷² Bɩ mam zelemdã pʋd yɩɩll n pẽg y goamã, bala, yãmb noyã fãa yaa tɩrse.

¹⁷³ Bɩ y tẽeg y nug n sõng-ma, bala, mam yãka yam n na n sak yãmb no-tũudsã.

¹⁷⁴ Sẽn-Ka-Saabo, mam sesdame n dat yãmb fãagrã, la yãmb tõodã kõta maam sũ-noogo.

¹⁷⁵ Sõng-y maam tɩ m vɩɩmd n pẽg yãmba! La bɩ yãmb bʋ-kaoorã sõng-ma!

¹⁷⁶ Mam saada wa peosg sẽn meneme, bɩ y bao y tʋmtʋmdã, bala, mam ka yĩmd yãmb noyã yell ye.