Yɩɩn‑sõamyã 118 - WẼNNAAM SEBRE 2014

Ned sẽn pʋʋsd Sẽn-Ka-Saab barka

¹ Pʋʋs-y Sẽn-Ka-Saab bark tɩ b pida ne sõmblem, bala, bãmb nonglmã paada wakat fãa!

² Bɩ Israyɛll nebã yeele: «Bãmb nonglmã paada wakat fãa!»

³ Bɩ a Aarõ pendã neb yeele: «Bãmb nonglmã paada wakat fãa!»

⁴ Bɩ sẽn zoet-b Sẽn-Ka-Saabã yeele: «Bãmb nonglmã paada wakat fãa!»

⁵ Mam yel-pakrã pʋga, mam boola Sẽn-Ka-Saabo: La b leoka maam, n kõ-m lohorem.

⁶ Sẽn-Ka-Saab bee ne maam, dẽ, rabeem ka tar maam ye. Ninsaalbã tõe n maana maam bõe?

⁷ Sẽn-Ka-Saab yaa mam sõangda, b na n kɩtame tɩ mam bɛɛbã lebg m bõn-gɛtla.

⁸ Fo sẽn na n teeg Sẽn-Ka-Saabo, n são f sẽn na n teeg ninsaalbã.

⁹ Fo sẽn na n teeg Sẽn-Ka-Saabo, n são f sẽn na n teeg dũniyã nin-kãsemse.

¹⁰ Bu-zẽmsã fãa rag n gũbga maam, la Sẽn-Ka-Saab yʋʋrã maasem yĩnga, mam kɛ-b lame n pase.

¹¹ Bãmb gũbga maam, n dɩdg maam zĩigã fãa, Sẽn-Ka-Saab yʋʋrã maasem yĩnga, mam kɛ-b lame n pase.

¹² Bãmb dag n gũbga maam wa sĩ-lolle. Bãmb kii wa gõos bugum. Sẽn-Ka-Saab yʋʋrã maasem yĩnga, mam kɛ-b lame n pase.

¹³ B rag n tusda maam n dat n lubi, la Sẽn-Ka-Saab wa n sõnga maam.

¹⁴ Sẽn-Ka-Saab yaa mam pãnga, la m teegr zĩiga. Bãmb n yaa mam fãagda.

¹⁵ Nin-tɩrsã fu-rot pʋse, tõogr kilsg n yit be. Sẽn-Ka-Saab nug-rɩtg tʋmda ne pãnga.

¹⁶ Sẽn-Ka-Saab nug-rɩtg tõogdame! Sẽn-Ka-Saab nug-rɩtg tʋma pãng tʋʋmã!

¹⁷ Mam ka na n ki ye. Mam na n vɩɩmdame, mam na n moona Sẽn-Ka-Saab tʋʋm-sõmyã.

¹⁸ Sɩdã, Sẽn-Ka-Saab sɩbga maam, la b ka kʋ-m ye.

¹⁹ Bɩ y pags tɩrlem kʋɩlemsã tɩ m kẽ, mam na n tũu be n kẽ n pʋʋs Sẽn-Ka-Saab barka.

²⁰ Nin-tɩrsã tũuda Sẽn-Ka-Saab tɩrlem kʋɩlemsẽ wã n kẽedẽ.

²¹ Mam na n pʋʋsa yãmb barka, y sẽn leok-ma yĩnga. Bala, yaa yãmb la m fãagda.

²² Tãn-metbã sẽn zãgs kugr ningã, kug-kãng lebga roogã pãng zĩigẽ kugri.

²³ Bõn-kãng yita Sẽn-Ka-Saab nengẽ. A yaa bõn-bãnd tõnd nifẽ.

²⁴ Ad daar ning Sẽn-Ka-Saab sẽn maan n kõ-do: Bɩ d kɩdem n maan sũ-noog ra-kãng yĩnga!

²⁵ Sẽn-Ka-Saabo, d wẽed-y-la kãntɩɩga, wa-y n fãag-y-do! Sẽn-Ka-Saabo, d kotame tɩ y kõ-d tõogre!

²⁶ Bark bee ned ning sẽn wat-a ne Sẽn-Ka-Saab yʋʋrã zugu! Tõnd bee Sẽn-Ka-Saab roogẽ wã, n ningd yãmb zut barka.

²⁷ Sẽn-Ka-Saab yaa Wẽnnaam, bãmb n vẽnegd tõndo. Bɩ y zã vãad n gũbg bãmb n yãag-ba, d yãag-b n tãag tẽn-kugrẽ wã!

²⁸ Yãmb yaa mam Wẽnnaam, mam na n pʋʋsa yãmb barka. Mam Wẽnnaam, mam na n balma yãmba.

²⁹ Pʋʋs-y Sẽn-Ka-Saab bark tɩ b pida ne sõmblem, bala, bãmb nonglmã paada wakat fãa!