Yɩɩn‑sõamyã 116 - WẼNNAAM SEBRE 2014

Ned sẽn põs kũum n pʋʋsd barka

¹ Mam nonga Sẽn-Ka-Saabo, bala, bãmb wʋmda mam koɛɛgã, ne m se-yõkrã.

² Bãmb kɩlla b tʋbr n kelg maam. Woto yĩnga, mam na n boola bãmb m vɩɩmã tɛka.

³ Kũum sẽbds rag n loee maam, la kɩɩm-kulg sũ-sãang rag n yõka maam. Mam dag n bee yel-pakr la yɩɩr pʋga.

⁴ La mam boola Sẽn-Ka-Saab n yeele: Sẽn-Ka-Saabo, m kotame tɩ y fãag-ma!

⁵ Sẽn-Ka-Saab yaa sõmblem soaba, la tɩrlem soaba. Tõnd Wẽnnaamã yaa nimbãan-zoɛta.

⁶ Sẽn-Ka-Saab kogenda neb nins sẽn ka tar-b yellã. Mam pãngã rag n sɛɛme, la b fãaga maam.

⁷ Mam na n leb n leba m vʋʋsg zĩigẽ, bala, Sẽn-Ka-Saab maan-m-la neere.

⁸ N-yẽe! Yãmb fãaga maam ne kũum, n fãag-m ne nintãm, n kɩt tɩ m naoor ka lak ye.

⁹ Mam na n kẽna Sẽn-Ka-Saab taoor dũniyã zugu, nin-vɩɩsã sʋka.

¹⁰ Baa mam sẽn dag n yet tɩ m namsda wʋsgã, mam dag n ket n maanda tẽebo!

¹¹ Mam sũ-sãangã pʋga, m yeelame: «Ninsaalbã fãa yaa zĩrẽ-be-nebã.»

¹² Maan-neer ning fãa Sẽn-Ka-Saab sẽn maan maamã, mam na n maana bõe n lebs bãmba?

¹³ Mam na n zẽka fãagr wamde, n pʋʋs Sẽn-Ka-Saab barka.

¹⁴ Mam na n pidsa m sẽn pʋlem Sẽn-Ka-Saab bũmb ningã, b nebã fãa nifẽ.

¹⁵ Sẽn-Ka-Saab nin-nongdsã kũun yaa bõn-kãseng bãmb nifẽ.

¹⁶ Sẽn-Ka-Saabo, mam yaa yãmb tʋmtʋmda, mam yaa yãmb tʋmtʋmd-poakã biiga. Yãmb logsa mam sẽbdsã.

¹⁷ Mam na n maana bark pʋʋsg maoong yãmb yĩnga, la m na n boola Sẽn-Ka-Saab yʋʋrã.

¹⁸ Mam na n pidsa m sẽn pʋlem Sẽn-Ka-Saab bũmb ningã, b nebã fãa nifẽ,

¹⁹ Sẽn-Ka-Saab zakã samandẽ wã, Zeruzalɛm tẽngã tẽn-sʋka! Pẽg-y Sẽn-Ka-Saabo!