Yɩɩn‑sõamyã 115 - WẼNNAAM SEBRE 2014

Wẽnnaam segda ne waoogre

¹ Sẽn-Ka-Saabo, ka tõnd n tog ne waoogr ye. Kɩt-y tɩ y yʋʋrã paam waoogre, yãmb maan-neerã ne y sɩdã yĩnga!

² Bõe yĩng tɩ bu-zẽmsã sokdẽ tɩ nin-bãmbã Wẽnnaamã bee yɛɛnẽ?

³ Tõnd Wẽnnaamã bee saasẽ, n maand b yam sẽn date.

⁴ Bu-zẽmsã wẽn-naandsã yaa wanzuri, la sãnem, n yaa ninsaalb nus n naane.

⁵ Wẽn-naandsã tara noore, la b ka gomd ye, b tara nini, la b ka ne ye.

⁶ Bãmb tara tʋba, la b ka wʋmd ye. Bãmb tara yõya, la b ka wʋmd yũug ye.

⁷ B tara nusi, la b ka tõe n sɩɩs bũmb ye, b tara nao, la b ka kẽnd ye. Koɛɛg ka tõe n yi bãmb kokorẽ ye.

⁸ Sẽn naan-b bãmbã ne sẽn teeg-b bãmbã fãa na n yɩɩ wa bãmba.

⁹ Israyɛll nebã, rɩk-y y teegrã n teeg Sẽn-Ka-Saabo! Sẽn-Ka-Saab n yaa yãmb sõangda, la y gãongo.

¹⁰ A Aarõ yagense, teeg-y Sẽn-Ka-Saabo! Sẽn-Ka-Saab n yaa bãmb sõangda, la b gãongo.

¹¹ Sẽn zoet-b Sẽn-Ka-Saabo, teeg-y Sẽn-Ka-Saabo! Sẽn-Ka-Saab n yaa bãmb sõangda, la b gãongo.

¹² Sẽn-Ka-Saab tẽra tõnd yelle, la b na n ning-d-la barka. Bãmb na n ninga Israyɛll buudã barka, la b na n ninga a Aarõ yagensã barka,

¹³ Sẽn-Ka-Saab na n ning sẽn zoet-b bãmbã barka, b nin-talse, la b nin-kãsemse.

¹⁴ Bɩ Sẽn-Ka-Saab kɩt tɩ yãmb ne y yagensã fɩɩge.

¹⁵ Bɩ Sẽn-Ka-Saab sẽn yaa yĩngr la tẽng naandã ning yãmb barka!

¹⁶ Yĩngr yaa Sẽn-Ka-Saab n so, la b rɩka tẽngã n kõ ninsaalbã.

¹⁷ Ka kũum n na n waoog Sẽn-Ka-Saabo, la ka sẽn be-b sɩddd... pʋgẽ wã n na n waoog bãmb ye.

¹⁸ La tõndo, tõnd na n pẽga Sẽn-Ka-Saabo, sẽn sɩng ne moasã la wakat sẽn ka sɛta. Pẽg-y Sẽn-Ka-Saabo!