Yɩɩn‑sõamyã 113 - WẼNNAAM SEBRE 2014

Sẽn-Ka-Saab ka tar mak-n-taag ye

¹ Pẽg-y Sẽn-Ka-Saabo! Sẽn-Ka-Saab tʋmtʋmdbã, pẽg-y bãmba! Pẽg-y Sẽn-Ka-Saab yʋʋrã!

² Bɩ Sẽn-Ka-Saab yʋʋrã paam pẽgre, moasã la wakat sẽn kõn sa!

³ Bɩ Sẽn-Ka-Saab yʋʋrã paam pẽgre, sẽn sɩng ne wĩntoogã pukr n tɩ tãag a kõom!

⁴ Sẽn-Ka-Saab yɩɩda bu-zẽmsã fãa, la bãmb ziirã gãndga saasã.

⁵ Ãnda soab n wẽnd Sẽn-Ka-Saab sẽn yaa tõnd Wẽnnaamã? Bãmb bee hal yĩngr n dɩt b naam.

⁶ Bãmb sulgd n geta saasẽ la dũniyã.

⁷ Bãmb yiisda ka-pãng soab tomẽ, la b yiisd nimbãan-ned tãmpʋʋrẽ.

⁸ Bãmb kɩtdame t'a zĩnd ne nin-kãsemse, n naag a buudã nin-kãsemse.

⁹ Bãmb kɩtdame tɩ pʋg-kiir paam doogo, n paam kamb t'a sũur noomẽ. Pẽg-y Sẽn-Ka-Saabo!